ഡല്ഹിയില് കൂട്ടബലാത്സംഗത്തിന് ഇരയായ യുവതിയെ നഗരമധ്യത്തില് പരസ്യമായി അപമാനിച്ച സംഭവത്തില് പതിനൊന്ന് പേര് അറസ്റ്റില്. എട്ട് സ്ത്രീകളും രണ്ട് പ്രായപൂര്ത്തിയാകാത്ത ആണ്കുട്ടികളും ഉള്പ്പെടെ പതിനൊന്ന് പേരെയാണ് പൊലീസ് അറസ്റ്റ് ചെയ്തിരിക്കുന്നത്. ബലാത്സംഗ കേസില് പ്രതികളായിട്ടുള്ള രണ്ട് പേരെയും അറസ്റ്റ് ചെയ്തിട്ടുണ്ട്.
രണട് ദിവസം മുമ്പ് കിഴക്കന് ഡല്ഹിയിലെ ഷാഹ്ദറയിലാണ് സംഭവം. പീഡനത്തിന് ഇരയായ യുവതിയെ വീട്ടില് നിന്നിറക്കി കൊണ്ടുപോയി പരസ്യമായി മര്ദ്ദിച്ചു.യുവതിയുടെ മുടി മുറിച്ച് മുഖത്ത് കരി ഓയില് ഒഴിക്കുകയും ചെയ്തു. ശേഷം ചെരിപ്പുമാല അണിയിച്ച് നഗരത്തിലൂടെ നടത്തിച്ചു. സംഭവത്തിന്ററെ ദൃശ്യങ്ങള് പുറത്ത് വന്നിരുന്നു. ഡല്ഹി വനിതാ കമ്മീഷന് അദ്ധ്യക്ഷ സ്വാതി മാലിവാളാണ് ദൃശ്യങ്ങള് പങ്കുവെച്ചത്. സംഭവത്തില് പൊലീസിന് പരാതിയും നല്കിയിരുന്നു.
പ്രദേശത്ത് അനധികൃതമായി മദ്യവില്പ്പന നടത്തുന്ന സംഘത്തിന് നേതൃത്വം നല്കുന്നയാളാണ് പീഡനക്കേസിലെ പ്രതി. ഇവരുടെ കൂടെ ഉണ്ടായിരുന്ന ഒരു ആണ്കുട്ടിയുടെ ആത്മഹത്യയെ തുടര്ന്നായിരുന്നു യുവതിക്ക് നേരെ ആക്രമണം ഉണ്ടായത്.