ജമ്മു കശ്മീരിലെ അനിശ്ചിതത്വത്തിനിടെ പ്രധാനമന്ത്രി നരേന്ദ്ര മോദിയും ആഭ്യന്തരമന്ത്രി അമിത് ഷായും ഇന്ന് രാവിലെ ഒരു മണിക്കൂർ ഡൽഹിയിലെ പ്രധാനമന്ത്രിയുടെ വസതിയിൽ പ്രത്യേക യോഗം ചേർന്നു. മന്ത്രിസഭാ യോഗത്തിന് മുമ്പായി നടന്ന യോഗത്തിൽ രാജ്യസുരക്ഷ ക്യാബിനറ്റ് കമ്മിറ്റിയിലെ അംഗങ്ങളാണ് പങ്കെടുത്തത്. പ്രധാനമന്ത്രി നരേന്ദ്ര മോദി, രാജ്‌നാഥ് സിംഗ്, അമിത് ഷാ, നിർമ്മല സീതാരാമൻ, എസ്. ജയ്‌ശങ്കർ എന്നിവരാണ് ഈ കമ്മറ്റിയിൽ ഉള്ളത്. കശ്മീരിലെ സവിശേഷ സാഹചര്യം ചര്‍ച്ച ചെയ്യാനാണ് യോഗം ചേർന്നതെന്നാണ് സൂചന.
ശ്രീനഗറിൽ അനിശ്ചിതകാലത്തേക്കു കേന്ദ്രം നിരോധനാജ്ഞ പ്രഖ്യാപിച്ചിരിക്കുകയാണ്. അധിക സൈനിക വിന്യാസത്തിനും കനത്ത സുരക്ഷയ്ക്കും പിന്നാലെ ജമ്മു കശ്മീരിൽ അസാധാരണ നടപടികളാണു കേന്ദ്രം സ്വീകരിക്കുന്നത്. അർദ്ധരാത്രി മെഹ്ബൂബ മുഫ്തി, ഒമർ അബ്ദുല്ല തുടങ്ങിയ നേതാക്കളെ ഉൾപ്പെടെ കശ്മീരിലെ രാഷ്ട്രീയക്കാരെ വീട്ടുതടങ്കലിലാക്കിയിരുന്നു. അഭൂതപൂർവമായ ഈ സാഹചര്യം കശ്മീരിലെ ജനങ്ങളെ അരക്ഷിതാവസ്ഥയിൽ ആക്കിയിരിക്കുകയാണ്.