2016 നവംബർ എട്ടിന് അർദ്ധരാത്രിയാവാൻ വെറും നാല് മണിക്കൂർ മാത്രം ബാക്കി നിൽക്കെ പെട്ടെന്ന് പ്രധാനമന്ത്രി മോദി ഒരു പ്രഖ്യാപനം നടത്തുന്നു. 500 രൂപയുടെയും 1000 രൂപയുടെയും നോട്ടുകൾ അർദ്ധരാത്രി മുതൽ നിരോധിച്ചിരിക്കുന്നു. രാജ്യം ഒന്നാകെ അമ്പരന്നു. എന്താണ് സംഭവിക്കുന്നതെന്നറിയാതെ പലരും പകച്ച് നിന്ന സമയം. രാജ്യത്തെ അമ്പരിപ്പിച്ച നോട്ട് നിരോധനത്തിന് ഇന്ന് ഒമ്പത് വർഷം തികഞ്ഞിരിക്കുകയാണ്.
2016 നവംബർ എട്ടിന് രാത്രി 8 മണിക്ക് ടെലിവിഷനിലൂടെ രാജ്യത്തെ അഭിസംബോധന ചെയ്താണ് പ്രധാനമന്ത്രി നരേന്ദ്രമോദി 500- 1000 നോട്ടുകൾ ഇനി നിയമപരമല്ലെന്ന് പ്രഖ്യാപിച്ചത്. അഞ്ഞൂറിന്റെയും ആയിരത്തിന്റെയും നോട്ടുകൾ പിൻവലിക്കുന്നതോടുകൂടി രാജ്യത്ത് കള്ളപ്പണത്തിന്റെ ഒഴുക്ക് തടയാനാകുമെന്നും തീവ്രവാദപ്രവർത്തനങ്ങളും മയക്കുമരുന്ന് കച്ചവടവും ഇല്ലാതാക്കാനാകുമെന്നുമായിരുന്നു പ്രധാനമന്ത്രിയുടെ അവകാശവാദം.
എന്നാൽ കേന്ദ്രത്തിന്റെ അപ്രതീക്ഷിത നീക്കത്തെ തുടർന്ന് പുതിയ നോട്ടുകൾ പിൻവലിക്കാനും പഴയ നോട്ടുകൾ മാറാനും ആളുകൾ നെട്ടോട്ടമോടി. എടിഎമ്മുകൾക്കും ബാങ്കുകൾക്കും പുറത്ത് നീണ്ട നിര. രാജ്യത്താകെ എൺപതോളം പേരാണ് കുഴഞ്ഞു വീണ് മരിച്ചത്. റിസർവ് ബാങ്ക് ഓഫ് ഇന്ത്യയുടെ 2016 -17 വാർഷിക റിപ്പോർട്ടിൽ നിരോധിച്ച നോട്ടുകളുടെ 99 ശതമാനവും ബാങ്കുകളിലേക്ക് തിരിച്ചെത്തിയിരുന്നു.