ഡോര് തുറക്കാനാകാതെ ആംബുലന്സില് കുടുങ്ങിയ രോഗി മരിച്ചു. വാഹനാപകടത്തില് പരിക്കേറ്റ് കോഴിക്കോട് മെഡിക്കല് കോളേജ് ആശുപത്രിയിലെത്തിച്ച കരുവന്തുരുത്തി സ്വദേശി കോയമോന് (66) ആണ് ചികിത്സ വൈകിയതിനെ തുടര്ന്ന് ഇന്ന് മരിച്ചത്.
സ്കൂട്ടര് ഇടിച്ചാണ് കോയമോന് പരിക്കേറ്റത്. തുടര്ന്ന് കോഴിക്കോട് ബീച്ച് ആശുപത്രിയിലും അവിടെ നിന്ന് മെഡിക്കല് കോളേജ് ആശുപത്രിയിലും എത്തിക്കുകയായിരുന്നു. എന്നാല് കോഴിക്കോട് മെഡിക്കല് കോളജ് ആശുപത്രിയില് കോയമോനുമായെത്തിയ ആംബുലന്സിന്റെ വാതില് തുറക്കാനായില്ല.
പിന്നീട് മഴു ഉപയോഗിച്ച് ഡോര് വെട്ടിപ്പൊളിച്ചാണ് രോഗിയെ പുറത്തെത്തിച്ചത്. തുടര്ന്ന് അത്യാഹിത വിഭാഗത്തില് പ്രവേശിപ്പിച്ചെങ്കിലും ജീവന് രക്ഷിക്കാനായില്ല.
ഇന്നലെ വൈകീട്ട നടന്ന സംഭവത്തെ കുറിച്ച് ആരോഗ്യ വകുപ്പ് അന്വേഷണം തുടങ്ങി. ബീച്ച് ആശുപത്രി ആര്എംഒയാണ് അന്വേഷണം നടത്തുന്നത്.