കുത്തകകള് മാധ്യമരംഗം കയ്യടക്കി ഉള്ളടക്കം മലീമസമാക്കുമ്പോള് പുതിയൊരു മാധ്യമ സാക്ഷരതാ യജ്ഞം ഉയര്ന്നുവരേണ്ടതുണ്ട്. വിദേശ, ദേശീയ കുത്തകകള് പ്രാദേശിക ഭാഷയില്പ്പോലും പിടിമുറുക്കുന്നു. കോടികള് വിതച്ച് കോടികള് കൊയ്യാന് മാധ്യമ ഉള്ളടക്കത്തെയും ജനമനസുകളെയും അവര് മലീമസമാക്കുകയാണ്. മാധ്യമങ്ങളുടെ അധാര്മിക ആക്രമണത്തിന് പുരോഗമന പ്രസ്ഥാനങ്ങളും ഇടതുപക്ഷവും വിധേയമാകുന്നു. ഹീനമായ വിദ്വേഷ പ്രചാരണത്തിനാണ് ചില മാധ്യമങ്ങള് ശ്രമിക്കുന്നത്. വര്ഗീയതയെ മുതല് ഭീകരതയെവരെ പരോക്ഷമായി വാഴ്ത്താനും അവര് മടിക്കുന്നില്ല. കര്ഷകരും പാര്ശ്വവല്ക്കരിക്കപ്പെട്ടവരും അടങ്ങുന്ന ഭൂരിപക്ഷ ജനതയ്ക്കൊപ്പം നില്ക്കാന് മാധ്യമങ്ങള്ക്കാകണം. സമൂഹത്തിന് എന്ത് നല്കിയെന്ന ചോദ്യത്തിന് ഉത്തരം നല്കാനുമാകണം.
നിഷ്പക്ഷത പലപ്പോഴും കാപട്യമാണ്. സത്യവും അസത്യവും ഏറ്റുമുട്ടുന്നിടത്ത് നിഷ്പക്ഷത അധാര്മികമാണ്. പല മാധ്യമങ്ങളും അധാര്മിക രാഷ്ട്രീയ ആയുധങ്ങളായി മാറുന്നത് നിഷ്പക്ഷതയുടെ മുഖംമൂടിയിട്ടാണ്. റേറ്റിങ് വര്ധിപ്പിക്കാന് എന്തും ചെയ്യാമെന്ന സമീപനം ചിലര് സ്വീകരിക്കുന്നുണ്ട്. അത് വിശ്വാസ്യതയെ ബലികഴിച്ചാകരുത്. വിശ്വാസ്യത നഷ്ടമായാല് എല്ലാം നഷ്ടപ്പെടും. പിന്നീടത് വീണ്ടെടുക്കല് പ്രയാസമാണ്.
കൈരളിയുടെ ചോദ്യങ്ങളെ ചിലര് ഭയപ്പെടുന്നുണ്ട്. ചിലപ്പോള് വിലക്കാറുമുണ്ട്. മറുപടിയില്ലെന്നും പറഞ്ഞിട്ടുണ്ടാകാം. ക്ഷണിച്ചുവരുത്തിയിട്ട്, പുറത്തുപോകാന് പറഞ്ഞിട്ടുണ്ടാകാം. അതുകൊണ്ടൊന്നും കൈരളി തകര്ന്നിട്ടില്ല. വേറിട്ടൊരു മാധ്യമം എന്ന മുദ്രാവാക്യം നിലനിര്ത്താന് കൈരളിക്കായി. കൈരളി ഉണ്ടായിരുന്നില്ലങ്കില് എന്താകുമായിരുന്നുവെന്ന് നാടാകെ ചിന്തിച്ച ഘട്ടങ്ങളുണ്ട്. അതാണ് കൈരളിയുടെ വിജയം.