കോഴിക്കോട് മെഡിക്കല് കോളേജില് പ്രസവ ശസ്ത്രക്രിയ്ക്ക് ശേഷം യുവതിയുടെ വയറ്റില് കത്രിക കുടുങ്ങിയ സംഭവത്തില് പുതുക്കിയ പ്രതിപ്പട്ടിക അന്വേഷണ സംഘം കോടതിയില് സമര്പ്പിച്ചു. പ്രസവ ശസ്ത്രക്രിയ നടന്ന സമയത്ത് ഡ്യൂട്ടിയിലുണ്ടായിരുന്ന രണ്ട് ഡോക്ടര്മാരും രണ്ട് നഴ്സുമാരുമാണ് പ്രതിപ്പട്ടികയിലുള്ളത്. കുന്ദമംഗലം കോടതിയിലാണ് പ്രതിപ്പട്ടിക സമര്പ്പിച്ചത്. 2017ല് യുവതിയുടെ മൂന്നാമത്തെ പ്രസവ ശസ്ത്രക്രിയ നടന്ന സമയത്താണ് യുവതിയുടെ വയറ്റില് കത്രിക കുടുങ്ങിയത്.
മെഡിക്കല് നെഗ്ലിജന്സ് ആക്ട് പ്രകാരമാണ് മെഡിക്കല് കോളേജ് പൊലീസ് കേസ് രജിസ്റ്റര് ചെയ്തത്. കേസില്പൊലീസ് അഞ്ച് മാസം കൊണ്ട് അന്വേഷണം പൂര്ത്തിയാക്കിയാണ് റിപ്പോര്ട്ട് കോടതിയ്ക്ക് കൈമാറുന്നത്. ഡോക്ടര്മാരുടെ ഭാഗത്ത് നിന്നുണ്ടായ വീഴ്ച വ്യക്താണെന്നും, പരാതിക്കാരിയുടെ വാദങ്ങള് ശരിയാണെന്നും മെഡിക്കല് കോളേജ് അസിസ്റ്റന്റ് കമ്മീഷ്ണര് കെ സുദര്ശന് അറിയിച്ചു.
മഞ്ചേരി മെഡിക്കല് കോളേജിലെ അസിസ്റ്റന്റ് പ്രൊഫസര് ഡോ. രമേശന് സി കെ, കോട്ടയം സ്വകാര്യ ആശുപത്രിയിലെ ഡോ ഷഹന, കോഴിക്കോട് മെഡിക്കല് കോളേജലെ നഴ്സുമാരായ രഹന, മഞ്ജു കെ. ജി എന്നിവരാണ് കേസിലെ പ്രതികള്. ശാസ്ത്രീയ തെളിവുകളുടെ അടിസ്ഥാനത്തിലാണ് ഇവരെ പ്രതിചേര്ത്തിരിക്കുന്നത്.
ഹര്ഷിനയുടെ പരാതി പ്രകാരം നേരത്തെ പ്രതിചേര്ത്തിരുന്ന മെഡിക്കല് കോളേജ് ഐ.എം.സി.എ.ച്ച് മുന് സൂപ്രണ്ട്, യൂണിറ്റ് മേധാവിമാരായിരുന്ന രണ്ടു ഡോക്ടര്മാര് എന്നിവരെ സംഭവത്തില് പങ്കില്ലെന്നുകണ്ട് പ്രതിപ്പട്ടികയില്നിന്ന് ഒഴിവാക്കിയിട്ടുണ്ട്. ഇതുസംബന്ധിച്ച റിപ്പോര്ട്ടും കോടതിയില് സമര്പ്പിച്ചിട്ടുണ്ട്. മെഡിക്കല് നെഗ്ലിജെന്സ് ആക്ട് പ്രകാരം രജിസ്റ്റര് ചെയ്ത കേസില് രണ്ടു വര്ഷംവരെ തടവുശിക്ഷ ലഭിക്കാവുന്ന കുറ്റങ്ങളാണ് പ്രതികള്ക്കെതിരെ ചുമത്തിയിരിക്കുന്നത്.
ശസ്ത്രക്രിയയ്ക്ക് ശേഷം കടുത്ത വയറുവേദന അനുഭവപ്പെട്ടതിനെ തുടര്ന്നാണ് ഹര്ഷീന വീണ്ടും ആശുപത്രിയിലെത്തിയത്. എന്നാല് വേദന തുന്നലിട്ടതിന്റേതെന്നായിരുന്നു ഡോക്ടര്മാരുടെ വാദം. തുടര്ന്ന് ശാരീരിക ബുദ്ധിമുട്ടുകളും, അണുബാധയും ഉണ്ടായതിനെ തുടര്ന്ന് സ്വകാര്യ ആശുപത്രിയില് ചികിത്സ തേടിയപ്പോഴാണ്, വയറിനുള്ളിലെ ലോഹവസ്തുവിനെപ്പറ്റി വിവരം ലഭിക്കുന്നത്. കോഴിക്കോട് മെഡിക്കല്കോളേജില് നടത്തിയ ശസ്ത്രക്രിയയിലൂടെയാണ് കത്രിക പുറത്തെടുത്തത്. മെഡിക്കൽ കോളജിലെ ശസ്ത്രക്രിയയ്ക്കിടെയാണു ഹർഷിനയുടെ വയറ്റിൽ കത്രിക കുടുങ്ങിയതെന്ന പൊലീസ് കണ്ടെത്തൽ ജില്ലാതല മെഡിക്കൽ ബോർഡ് തള്ളിയെങ്കിലും തുടർ നടപടികളുമായി പൊലീസ് മുന്നോട്ടു പോകുകയായിരുന്നു.