അര്ബുദം ഇല്ലാഞ്ഞിട്ടും കീമോ തെറാപ്പിക്ക് വിധേയയാക്കിയ ആലപ്പുഴ കുടശ്ശനാട് സ്വദേശി രജനിക്ക് സര്ക്കാര് ധനസഹായം പ്രഖ്യാപിച്ചു. മുഖ്യമന്ത്രിയുടെ ദുരിതാശ്വാസ നിധിയില് നിന്ന് മൂന്നു ലക്ഷം രൂപ അനുവദിക്കാനാണ് മന്ത്രിസഭ തീരുമാനിച്ചത്. സ്വകാര്യ ലാബിലെ തെറ്റായ പരിശോധനാ റിപ്പോര്ട്ടിനെ തുടര്ന്നാണ് കോട്ടയം ഗവ. മെഡിക്കല് കോളജില് രജനി കീമോതെറാപ്പിക്ക് വിധേയയായത്.
കീമോതെറാപ്പി കാരണമുണ്ടായ ചികിത്സാചെലവും ശാരീരിക അവശതകളും മാനസികാഘാതവും പരിഗണിച്ചാണ് ധനസഹായം അനുവദിക്കുന്നത്. നേരത്തെ, തിരുവോണ നാളില് മാവേലിക്കര താലൂക്ക് ഓഫീസിന് മുന്നില് രജനി സമരം നടത്തിയിരുന്നു. ചികിത്സാ പിഴവ് വരുത്തിയ കോട്ടയം മെഡിക്കല് കോളജ് ആശുപത്രിയിലെ ഡോക്ടര്മാര്ക്കെതിരെ നടപടി എടുക്കുക , കുടുംബത്തിന് നഷ്ടപരിഹാരം ഉറപ്പാക്കുക എന്നീ ആവശ്യങ്ങള് ഉന്നയിച്ചായിരുന്നു രജനിയുടെ സമരം.
സ്വകാര്യ ലാബിലെ തെറ്റായ പരിശോധനാ ഫലത്തിന്റെ അടിസ്ഥാനത്തില് കഴിഞ്ഞ ഫെബ്രുവരിയിലാണ് രജനിക്ക് കോട്ടയം മെഡിക്കല് കോളജ് ആശുപത്രിയില് കീമോ തെറാപ്പി ചെയ്ത്. ചികിത്സാപിഴവിനെ കുറിച്ചുള്ള വാര്ത്തകള് പുറത്തുവന്നതോടെ ആരോഗ്യവകുപ്പ് ഡോക്ടര്മാരുടെ വിദഗ്ധ സംഘത്തെ അന്വേഷണത്തിന് നിയോഗിച്ചു.
മെഡിക്കല് കോളജിലെ ഡോക്ടര്മാര്ക്ക് വീഴ്ച പറ്റിയെന്ന റിപ്പോര്ട്ട് സംഘം സര്ക്കാരിന് സമര്പ്പിച്ചിരുന്നു. നീതി തേടി രജനിയും കുടുംബവും കഴിഞ്ഞ ജൂണ് മാസത്തില് മുഖ്യമന്ത്രിയെ കണ്ടിരുന്നു. ഇതിനിടെ ചീഫ് സെക്രട്ടിയുടെ റിപ്പോര്ട്ടിന്റെ അടിസ്ഥാനത്തില് രജനിക്കും കുടുംബത്തിനും സഹായം നല്കുമെന്ന് മുഖ്യമന്ത്രി നിയമസഭയില് ഉറപ്പും നല്കി.
എന്നാല് യാതൊരു നടപടിയും ഉണ്ടായില്ല. ഇതോടെയാണ് ഓണനാളില് രജനി സമരം നടത്തിയത്. തുടര്ന്ന് 10 ദിവസത്തിനകം നടപടിയുണ്ടാകുമെന്ന് ജില്ലാ കളക്ടര് ഉറപ്പ് നല്കിയതിനെ തുടര്ന്നാണ് സമരം നിര്ത്താന് തയ്യാറായത്.