ഫോര്ട്ട് കൊച്ചിയിലെ നമ്പര് 18 ഹോട്ടലുമായി ബന്ധപ്പെട്ട പോക്സോ കേസില് മൂന്നാം പ്രതിയായ അഞ്ജലി റിമാ ദേവിന് ജാമ്യം. കേസിലെ ഒന്നാം പ്രതിയും നമ്പര് 18 ഹോട്ടലുടമയുമായ റോയി വയലാട്ടിന്റെയും രണ്ടാം പ്രതിയായ സൈജു തങ്കച്ചന്റെയും ജാമ്യാപക്ഷേ ഹൈക്കോടതി തളളി. ഹൈക്കോടതി സിംഗിള് ബെഞ്ചാണ് ഹര്ജി തള്ളിയത്.
നമ്പര് 18 ഹോട്ടലില് എത്തിച്ച് പ്രായപൂര്ത്തിയാകാത്ത പെണ്കുട്ടിയെ ബലാത്സംഗം ചെയ്യാന് ശ്രമിച്ചു എന്നാണ് ഇവര്ക്കെതിരെയുള്ള കേസ്. കേസിലെ ആദ്യ രണ്ട് പ്രതികളായ റോയി വയലാട്ടിനെയും സൈജു തങ്കച്ചനെയും കസ്റ്റഡിയില് ചോദ്യം ചെയ്യേണ്ടതുണ്ട് എന്ന പ്രോസിക്യൂഷന്റെ വാദം അംഗീകരിച്ചാണ് നടപടി.
തങ്ങളെ ഭീഷണിപ്പെടുത്തി പണം തട്ടിയെടുക്കാനുള്ള ശ്രമമാണ് പരാതിക്കാരിയുടേത് എന്നാണ് ഹര്ജിയില് പറഞ്ഞിരുന്നത്. ഈ പരാതി ബ്ലാക് മെയിലിങ്ങിന്റെ ഭാഗമാണ്. 3 മാസം കഴിഞ്ഞാണ് പെണ്കുട്ടിയും അമ്മയും പരാതി നല്കിയതെന്നും കേസ് കെട്ടിച്ചമച്ചത് ആണെന്നുമായിരു്ന്നു പ്രതികള് കോടതിയില് വാദിച്ചത്. മുന് മിസ് കേരളയടക്കം വാഹനാപകടത്തില് മരിച്ച സംഭവത്തിലും റോയി വയലാട്ടും സൈജു തങ്കച്ചനും പ്രതികളാണ്.