പ്ലസ് വണ്‍ പ്രവേശനത്തിന് അപേക്ഷിക്കാന്‍ ഒരു ദിവസം കൂടി നീട്ടി നല്‍കി ഹൈക്കോടതി. സിബിഎസ്ഇ വിദ്യാര്‍ത്ഥികളുടെ പത്താംക്ലാസ് ഫലം വരാത്ത സാഹചര്യത്തിലാണ് കോടതിയുടെ ഇടക്കാല ഉത്തരവ്. ഹര്‍ജി നാളെ വീണ്ടും പരിഗണിക്കും.
പത്താംക്ലാസിന്റെ ഫലപ്രഖ്യാപനം എപ്പോഴാണെന്ന കാര്യം സിബിഎസ്ഇ നാളെ കോടതിയില്‍ വ്യക്തമാക്കും. സമയം നീട്ടുന്നത് അധ്യയന വര്‍ഷത്തെ മുഴുവനായി താളം തെറ്റിക്കുമെന്ന് ഹൈക്കോടതിയില്‍ സമര്‍പ്പിച്ച സത്യവാങ്മൂലത്തില്‍ സര്‍ക്കാര്‍ പറയുന്നു. സ്റ്റേറ്റ് സിലബസില്‍ പഠിച്ച വിദ്യാര്‍ത്ഥികള്‍ ഒരു മാസമായി പ്രവേശനത്തിന് കാത്തിരിക്കുകയാണ്. ഇനിയും സമയം അനുവദിക്കുന്നത് അംഗീകരിക്കാനാവില്ലെന്നും സര്‍ക്കാര്‍ വാദിച്ചു.
മലപ്പുറം സ്വദേശികളായ രണ്ടു സിബിഎസ്ഇ വിദ്യാര്‍ഥികളും രക്ഷിതാക്കളുമാണ് ഹര്‍ജിയുമായി ഹൈക്കോടതിയെ സമീപിച്ചത്. നേരത്തെ ഹര്‍ജി പരിഗണിച്ച കോടതി അപേക്ഷ നല്‍കാനുള്ള സമയപരിധി ഇന്ന് ഉച്ചവരെ നീട്ടാന്‍ നിര്‍ദ്ദേശിച്ചിരുന്നു. ഇതുവരെ ഫലം വരാത്ത സാഹചര്യത്തില്‍ വീണ്ടും നീട്ടണമെന്ന ആവശ്യവുമായി വിദ്യാര്‍ത്ഥികള്‍ വീണ്ടും കോടതിയെ സമീപിക്കുകയായിരുന്നു.