മുഖ്യമന്ത്രി പിണറായി വിജയനെതിരെ രൂക്ഷ വിമര്‍ശനം ഉന്നയിച്ച് കെപിസിസി അധ്യക്ഷന്‍ കെ സുധാകരന്‍. പിണറായി വിജയന് ഒരു കൊലയാളിയുടെ മനസാണെന്ന് കെ സുധാകരന്‍ പറഞ്ഞു. ഇത്രയൊക്കെ ചെയ്തിട്ടും പിണറായിക്കെതിരെ കേസെടുക്കാത്ത സംസ്ഥാനത്ത് നിരപരാധികള്‍ക്കെതിരെ കേസെടുക്കാന്‍ പറയുമ്പോള്‍ എന്ത് നിയമ വാഴ്ചയാണ് ഇവിടെയുള്ളതെന്നും സുധാകരന്‍ ചോദിച്ചു.
യൂത്ത് കോണ്‍ഗ്രസിനെതിരെ വധശ്രമത്തിന് കേസെടുത്ത സംഭവത്തില്‍ പ്രതികരിക്കുകയായിരുന്നു സുധാകരന്‍. 2024 പിണറായി വിജയന് ഉറക്കമില്ലാത്ത നാളുകളാവും. കോണ്‍ഗ്രസ് പ്രതിഷേധ സമരം ബ്ലോക്ക് തലത്തിലേക്ക് വ്യാപിപ്പിക്കും. നവകേരള സദസിലെ പൊലീസ് നടപടിയില്‍ ജുഡീഷ്യല്‍ അന്വേഷണം ആവശ്യപ്പെട്ട് കോടതിയെ സമീപിക്കുമെന്നും കെ സുധാകരന്‍ അറിയിച്ചു.
കരിങ്കൊടി പ്രതിഷേധത്തിന് പോലും കേരളത്തില്‍ സാധിക്കുന്നില്ല. ഇവിടെ നിയമവാഴ്ച ഉണ്ടോ. ഡിജിപി കസേരയില്‍ ഇരിക്കാന്‍ അര്‍ഹത ഇല്ലാത്ത ആളാണ് ഇപ്പോള്‍ ആ കസേരയിലുള്ളത്. സംസ്ഥാനത്ത് നിലവില്‍ രണ്ട് ഡിജിപിയുണ്ടെന്ന അവസ്ഥയാണ്. സിപിഎം നേതാവ് പി ശശി ആക്ടിംഗ് ഡിജിപിയാകുന്നുവെന്നും സുധാകരന്‍ പരിഹസിച്ചു.