റോഡില് ബൈക്ക് അഭ്യാസം കാണിക്കുന്നവരെ കുടുക്കാന് പൊതുജനങ്ങളുടെ സഹായം തേടി മോട്ടോര് വാഹന വകുപ്പ് (എം.വി.ഡി). നിയമലംഘനങ്ങള് കണ്ടാല് ദൃശ്യങ്ങള് എടുത്ത് അയക്കാന് എം.വി.ഡി എല്ലാ ജില്ലകളിലും പ്രത്യേക മൊബൈല് നമ്പറുകള് ഏര്പ്പെടുത്തി.
വാഹനങ്ങള് റോഡ് സുരക്ഷയ്ക്ക് ഭീഷണിയാകുന്ന രൂപമാറ്റങ്ങള് വരുത്തുക, സൈലന്സറുകള് മാറ്റി അതി തീവ്ര ശബ്ദം പുറപ്പെടുവിക്കുക, പൊതു നിരത്തുകളില് അഭ്യാസം പ്രകടനം / മല്സരയോട്ടം നടത്തുക, അമിത വേഗതയിലും അപകടകരമായും വാഹനമോടിക്കുക തുടങ്ങിയ പൊതുജനങ്ങളുടെ സുരക്ഷക്കും സൈ്വര ജീവിതത്തിനും ഭീഷണിയും തടസ്സവും സൃഷ്ടിക്കുന്ന വാഹനങ്ങളെ /ഡ്രൈവര്മാരെ പറ്റിയുള്ള വിവരങ്ങള് ഫോട്ടോകള് / ചെറിയ വീഡിയോകള് സഹിതം അതത് ജില്ലകളിലെ എന്ഫോഴ്സ്മെന്റ് ആര്.ടി.ഒ മാരെ അറിയിക്കാവുന്നതാണ്.
ദൃശ്യങ്ങളോടൊപ്പം സ്ഥലം, താലൂക്ക്, ജില്ല എന്നവ കൂടി ഉള്പ്പെടുത്തണം. വിവരങ്ങള് നല്കുന്നവരുടെ വിശദാംശങ്ങള് രഹസ്യമായി സൂക്ഷിക്കുമെന്നും എം.വി.ഡി ഉറപ്പ് നല്കിയിട്ടുണ്ട്.
നിയമ ലംഘനങ്ങള് തടയാന് ഓപ്പറേഷന് സൈലന്സ് എന്ന പേരില് പ്രത്യേക പരിശോധന നടത്തി വരികയാണ്. ആയിരക്കണക്കിന് വാഹനങ്ങള്ക്കതിരെ നടപടി സ്വീകരിച്ചിട്ടുണ്ട്. എന്നാല് പരിമിതമായ അംഗ സംഖ്യയുള്ള മോട്ടോര് വാഹന വകുപ്പിലെ ഉദ്യോഗസ്ഥരുടെ പ്രവര്ത്തനം കൊണ്ടു മാത്രം ഇത്തരം നിയമ ലംഘനങ്ങള് തടയാന് സാധിക്കില്ല. അതിനാലാണ് വകുപ്പ് പൊതുജനങ്ങളുടെ സഹായം കൂടി തേടിക്കൊണ്ടുള്ള പുതിയ നീക്കം ആരംഭിച്ചിരിക്കുന്നത്.
അതേസമയം ഓപ്പറേഷന് സൈലന്സിലൂടെ ഒരാഴ്ച കൊണ്ട് പിഴത്തുകയായി ഈടാക്കിയത് 8,68,1000 രൂപയാണ്. 68 ലക്ഷവും ഈടാക്കിയിരിക്കുന്നത് അനധികൃത രൂപമാറ്റത്തിനാണ്. 18 ലക്ഷം അമിതവേഗത്തിന് പിഴ ചുമത്തിയതാണ്.