മുഖ്യമന്ത്രിയും മറ്റ് മന്ത്രിമാരും നടത്താനിരിക്കുന്ന മണ്ഡല പര്യടനത്തെ പരിഹസിച്ച് പ്രതിപക്ഷ നേതാവ് വിഡി സതീശന്‍. കേരള സര്‍ക്കാരിന്റെ നേട്ടങ്ങളുടെ പ്രചരണാര്‍ത്ഥം കെഎസ്ആര്‍ടിസി ബസിലാണ് മണ്ഡല പര്യടനം നടത്താന്‍ ഉദ്ദേശിച്ചിരിക്കുന്നത്. ബസില്‍ കയറുന്നതിന് മുന്‍പ് ഡ്രൈവര്‍ക്കും കണ്ടക്ടര്‍ക്കും ശമ്പളം കിട്ടിയിട്ട് എത്ര നാളായെന്ന് ചോദിക്കുന്നത് നന്നായിരിക്കുമെന്നാണ് വിഡി സതീശന്റെ പരിഹാസം.
ഫേസ്ബുക്ക് പോസ്റ്റിലൂടെയാണ് സതീശന്‍ ഭരണപക്ഷത്തെ കടന്നാക്രമിച്ചത്. പ്രത്യേകം തയ്യാറാക്കിയ കെഎസ്ആര്‍ടിസി ബസിലാണത്രേ യാത്ര. ബസില്‍ കയറുന്നതിന് മുന്‍പ് ഡ്രൈവര്‍ക്കും കണ്ടക്ടര്‍ക്കും ശമ്പളം കിട്ടിയിട്ട് എത്ര നാളായെന്ന് ചോദിക്കുന്നത് നന്നായിരിക്കും. ഇല്ലെങ്കില്‍ അവര്‍ ചിലപ്പോള്‍ നിങ്ങളെ വഴിയിലിട്ട് പോയാലോ എന്നാണ് വി ഡി സതീശന്‍ ഫേസ്ബുക്കില്‍ കുറിച്ചത്.
ലോക്‌സഭാ തിരഞ്ഞെടുപ്പിന് മുന്നോടിയായി മുഖം മിനുക്കാനുള്ള തയ്യാറെടുപ്പിന്റെ ഭാഗമായാണ് മേഖലാ അവലോകന യോഗങ്ങളും മണ്ഡലം സദസുമായി സംസ്ഥാന സര്‍ക്കാര്‍ സജീവമാകാനൊരുങ്ങുന്നത്. മണ്ഡല പര്യടനത്തിനുള്ള ബസ് കെഎസ്ആര്‍ടിസി നല്‍കും. ബസ് സജ്ജമാക്കുന്ന ചുമതല ഗതാഗത വകുപ്പ് മന്ത്രി ആന്റണി രാജുവിന്റേതാണ്. 25 പേര്‍ക്ക് യാത്ര ചെയ്യാന്‍ സാധിക്കുന്ന തരത്തിലുള്ളതാണ് ബസ്.