കൊല്ലത്ത് സ്‌കൂളിലെ കിണറ്റില്‍ വീണ് വിദ്യാര്‍ത്ഥിയ്ക്ക് പരിക്ക്. കൊല്ലം കുന്നത്തൂരിലാണ് ഇന്ന് രാവിലെ അപകടം സംഭവിച്ചത്. തുരുത്തിക്കര എംടിയുപി സ്‌കൂളിലെ ആറാം ക്ലാസ് വിദ്യാര്‍ത്ഥി ഫെബിനാണ് അപകടം സംഭവിച്ചത്. സുഹൃത്തുക്കള്‍ക്കൊപ്പം കളിച്ചുകൊണ്ടിരുന്ന ഫെബിന്‍ കാല്‍ വഴുതി കിണറ്റിലേക്ക് വീഴുകയായിരുന്നു.
സംഭവത്തിന് പിന്നാലെ കിണറ്റില്‍ വീണ വിദ്യാര്‍ത്ഥിയെ സ്‌കൂള്‍ ജീവനക്കാരനാണ് രക്ഷപ്പെടുത്തിയത്. കുട്ടിയുടെ കാലിനും തലയ്ക്കും പരിക്കേറ്റിട്ടുണ്ട്. വിദ്യാര്‍ത്ഥിയെ ഉടന്‍ തന്നെ കൊല്ലത്തെ സ്വകാര്യ ആശുപത്രിയില്‍ പ്രവേശിപ്പിച്ചു. കിണറിന്റെ മൂടിയ്ക്ക് ബലക്കുറവുണ്ടെന്ന് നാട്ടുകാര്‍ പറയുന്നു.
സംഭവം മാധ്യമങ്ങളില്‍ വാര്‍ത്തയായതോടെ വിഷയത്തില്‍ വിദ്യാഭ്യാസ വകുപ്പ് ഇടപെട്ടിട്ടുണ്ട്. സ്‌കൂളില്‍ എഇഒ നടത്തിയ പരിശോധനയില്‍ കിണറ്റിന്റെ മൂടി ദ്രവിച്ചിരുന്നതായി കണ്ടെത്തി. ഡിഒയ്ക്കും ഡിഡിഇയ്ക്കും ഇതുസംബന്ധിച്ച് റിപ്പോര്‍ട്ട് നല്‍കിയിട്ടുണ്ട്.
