എറണാകുളം ആലുവയില്‍ പൊലീസ് പരിശോധനയില്‍ ആയുധശേഖരവും പണവും പിടിച്ചെടുത്തു. നാല് തോക്കുകളും എട്ട് ലക്ഷത്തിലേറെ രൂപയുമാണ് പിടികൂടിയത്. റിയാസ് എന്ന വ്യക്തിയുടെ വീട്ടില്‍ നിന്നാണ് പൊലീസ് പണവും ആയുധങ്ങളും കണ്ടെത്തിയത്. പുലര്‍ച്ചെ റേഞ്ച് ഡിഐജിയ്ക്ക് ലഭിച്ച രഹസ്യ വിവരത്തെ തുടര്‍ന്നായിരുന്നു പരിശോധന.
ആലുവ മാഞ്ഞാലിയിലുള്ള രണ്ട് വീടുകളില്‍ പൊലീസ് പരിശോധന നടത്തിയത്. കഴിഞ്ഞ കുറച്ച് നാളുകളായി റിയാസ് പൊലീസിന്റെ നിരീക്ഷണത്തിലായിരുന്നു. പെരുമ്പാവൂര്‍ കേന്ദ്രീകരിച്ചുള്ള ഗുണ്ടാസംഘവുമായി റിയാസിന് ബന്ധമുണ്ടെന്ന് പൊലീസ് പറയുന്നു. റിയാസിനെതിരെ കൊലക്കേസ് ഉള്‍പ്പെടെ വിവിധ കേസുകളുണ്ടെന്നാണ് വിവരം.
രണ്ട് പിസ്റ്റളുകളും രണ്ട് റിവോള്‍വറുമാണ് ഇയാളില്‍ നിന്ന് പിടിച്ചെടുത്തത്. നിലവില്‍ റിയാസിനെ പൊലീസ് ചോദ്യം ചെയ്യുന്നുണ്ട്. ഇയാളുടെ അറസ്റ്റ് ഉടന്‍ രേഖപ്പെടുത്തുമെന്നാണ് വിവരം.
