ശമ്പളം ഒന്നാം തീയതി തരുമെന്ന് പറഞ്ഞിട്ടും സമരം നടത്തുന്നത് ശരിയല്ലെന്ന് ഗതാഗത വകുപ്പ് മന്ത്രി കെബി ഗണേഷ്കുമാര്. കെഎസ്ആര്ടിസി നിലനില്ക്കേണ്ടത് കേരളത്തിന്റെ ആവശ്യമാണ്. ഇന്നത്തെ ടിഡിഎഫ് സമരം പൊളിഞ്ഞ് പാളീസായി. ബസിന് കേടുപാട് വരുത്തിയതിന് സമരത്തിന് ആഹ്വാനം ചെയ്തവര് നഷ്ടപരിഹാരം തരേണ്ടിവരുമെന്നും മന്ത്രി കൂട്ടിച്ചേര്ത്തു.
അതിന് നിയമനടപടിയും തുടങ്ങിയിട്ടുണ്ട്. കേരളത്തിലെ ജനങ്ങള് തന്നെ എത്രത്തോളം സ്നേഹിക്കുന്നു എന്നതിന്റെ തെളിവാണ് ഇന്നത്തെ സമരം. പ്രാകൃത സമരം ഇനി വേണ്ട എന്ന സന്ദേശമാണ് ഇത് നല്കുന്നത്. വാശി കാണിക്കുന്നത് ജനങ്ങളോടാണെന്നും ഗണേഷ്കുമാര് പറഞ്ഞു. കൊട്ടാരക്കരയിലാണ് ബസുകളുടെ വയറിങ്ങ് നശിപ്പിച്ചതായി പരാതി ഉയര്ന്നത്.
പണിമുടക്കിനിടെ ബസുകള് സര്വീസ് നടത്താതിരിക്കാനാണ് ബസുകളുടെ വയറിങ്ങ് നശിപ്പിച്ചത്. സംഭവത്തില് സമഗ്ര അന്വേഷണത്തിന് മന്ത്രി ഉത്തരവിട്ടു. എട്ട് ബസുകളാണ് ഇത്തരത്തില് നശിപ്പിച്ചത്. ഊര്ജ്ജിതമായ പൊലീസ് അന്വേഷണം നടത്തിക്കുന്നതിനും പൊതുമുതല് നശീകരണം തടയല് നിയമ പ്രകാരമുള്ള നടപടികള് സ്വീകരിക്കുന്നതിനും നിര്ദ്ദേശിച്ചിട്ടുണ്ട്.