പത്തനംതിട്ടയില്‍ ചക്ക വേവിച്ച് നല്‍കാത്തതിനെ തുടര്‍ന്ന് അമ്മയെ ക്രൂരമായി മര്‍ദ്ദിച്ച മകന്‍ അറസ്റ്റില്‍. പത്തനംതിട്ട റാന്നി സ്വദേശിനിയായ 65കാരി സോരജനിക്ക് നേരെയായിരുന്നു മകന്‍ വിജേഷിന്റെ ആക്രമണം. മര്‍ദ്ദനത്തില്‍ സരോജനിയുടെ ഇരു കൈകള്‍ക്കും പൊട്ടലുണ്ട്. ഇതിന് പുറമേ നട്ടെല്ലിനും തലയ്ക്കും പരിക്കേറ്റിട്ടുണ്ട്.
ഇന്ന് രാവിലെ ആയിരുന്നു ക്രൂര കൃത്യം അരങ്ങേറിയത്. ബന്ധുവീട്ടില്‍ നിന്നും വിജേഷ് കൊണ്ടുവന്ന ചക്ക വേവിച്ച് നല്‍കാന്‍ അമ്മയോട് ആവശ്യപ്പെട്ടു. തുടര്‍ന്ന് ഇയാള്‍ പുറത്തേക്ക് പോയി. എന്നാല്‍ വീട്ടില്‍ മറ്റ് ജോലികള്‍ ഉണ്ടായിരുന്നതിനാല്‍ സരോജനിക്ക് ചക്ക പാചകം ചെയ്യാന്‍ കഴിഞ്ഞില്ല.
ഇതിനിടെ മദ്യപിച്ച് വീട്ടില്‍ തിരിച്ചെത്തിയ പ്രതി ചക്ക വേവിച്ച് നല്‍കാത്തതില്‍ പ്രകോപിതനായി മാതാവിനെ മര്‍ദ്ദിക്കുകയായിരുന്നു. വീടിന് സമീപത്തുണ്ടായിരുന്ന വടി ഉപയോഗിച്ചായിരുന്നു പ്രതിയുടെ ക്രൂരത. പരിക്കിനെ തുടര്‍ന്ന് സരോജനിയെ കോട്ടയം മെഡിക്കല്‍ കോളേജ് ആശുപത്രിയിലേക്ക് മാറ്റിയിട്ടുണ്ട്. പ്രതി സ്ഥിരം മദ്യപാനിയാണെന്ന് പൊലീസ് പറയുന്നു.