സിപിഐഎം മുൻ നേതാവും കെഎസ്‌യു മുൻ സംസ്ഥാന സെക്രട്ടറിയും ബിജെപിയിൽ ചേർന്നു. സിപിഐഎം ഒറ്റപ്പാലം മുൻ ഏരിയാ കമ്മറ്റി അംഗവും അമ്പലപ്പാറ ഗ്രാമപഞ്ചായത്ത് മുൻ പ്രസിഡന്റുമായിരുന്ന കെകെ കുഞ്ഞൻ, കെഎസ്‌യു മുൻ സംസ്ഥാന സെക്രട്ടറി കൈലാസ് നാഥ് മേനോൻ എന്നിവരാണ് ബിജെപിയിൽ ചേർന്നത്.
ബിജെപിയുടെ വികസിത കേരളം കൺവെൻഷൻ വേദിയിൽ സംസ്ഥാന അധ്യക്ഷൻ രാജീവ് ചന്ദ്രശേഖറിൽ നിന്നാണ് ഇരുവരും അംഗത്വം സ്വീകരിച്ചത്. സിപിഐഎം ലോക്കൽ കമ്മറ്റി അംഗമായിരിക്കെയാണ് കുഞ്ഞൻ പാർട്ടിയിൽ നിന്ന് രാജിവെയ്ക്കുന്നത്. നേതൃത്വവുമായുള്ള അഭിപ്രായ വ്യത്യാസമാണ് സിപിഐഎം ബന്ധം അവസാനിപ്പിക്കാൻ കാരണമെന്ന് കെകെ കുഞ്ഞൻ പ്രതികരിച്ചു.
പാർട്ടി കമ്മിറ്റികളിൽ നിന്ന് അവഗണന നേരിട്ടു, പരിഹാസ പാത്രമായി. നേതാക്കന്മാർ അവഗണിച്ചാൽ പാർട്ടിയിൽ നിൽക്കേണ്ടതില്ലെന്നും തന്നെ വേണ്ടെന്ന് തോന്നിയ സാഹചര്യത്തിലാണ് പാർട്ടി വിട്ടതെന്നും കെകെ കുഞ്ഞൻ പറഞ്ഞു. ഡിവൈഎഫ്‌ഐ മുൻ ബ്ലോക്ക് സെക്രട്ടറി, കർഷക തൊഴിലാളി യൂണിയൻ സംഘടനകളുടെ ചുമതലകൾ വഹിച്ചിട്ടുണ്ട്.
