സംസ്ഥാനത്ത് പ്രധാനമന്ത്രി നരേന്ദ്ര മോദി 10,800 കോടി രൂപയുടെ വിവിധ വികസന പദ്ധതികളുടെ ഉദ്ഘാടനവും തറക്കല്ലിടലും നിര്വഹിച്ചു. കലൂര് സ്റ്റേഡിയത്തിലായിരുന്നു ചടങ്ങ്. കേരളത്തിന്റെ വികസനത്തിന് വേഗം പകരുന്നതിനുള്ള അവസരമാണ് ഇന്ന് കൈവന്നിരിക്കുന്നതെന്നു പ്രധാനമന്ത്രി പറഞ്ഞു. ഉദ്ഘാടന ചടങ്ങില് പൊതുമരാമത്ത് മന്ത്രി പി.എ മുഹമ്മദ് റിയാസിന് ക്ഷണമില്ലാത്തതിനെ തുടര്ന്ന് സര്ക്കാര് ചടങ്ങ് ബഹിഷ്കരിച്ചു. സമാന്തരമായി ഉദ്ഘാടനവും തീരുമാനിച്ചു. മുഖ്യമന്ത്രിക്ക് ക്ഷണമുണ്ടെങ്കിലും പങ്കെടുക്കില്ല. ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് പരിപാടിയില് പങ്കെടുക്കുന്നുണ്ട്.
5,500 കോടി രൂപ ചെലവിട്ടു ബിപിസിഎല് കൊച്ചി റിഫൈനറിയില് സ്ഥാപിക്കുന്ന പോളിപ്രൊപ്പിലിന് പ്ലാന്റിനു പ്രധാനമന്ത്രി തറക്കല്ലിട്ടു. പ്രതിവര്ഷം 4 ലക്ഷം ടണ് പോളിപ്രൊപ്പിലിന് പ്ലാന്റില് ഉല്പ്പാദിപ്പിക്കാന് കഴിയുമെന്ന് പ്രധാനമന്ത്രി പറഞ്ഞു. എഐ മേഖലയിലും സെമികണ്ടക്ടര് മേഖലയിലും രാജ്യം പുരോഗതി കൈവരിക്കുകയാണ്. സൗരോര്ജ ശക്തിയില് പ്രമുഖ രാജ്യമാണ് നാം. കേരളവും സൗരോര്ജ മേഖലയില് മുന്നേറണം. ഇതിനായാണ് കൊല്ലം ജില്ലയിലെ വെസ്റ്റ് കല്ലടയില് 50 മെഗാവാട്ട് ശേഷിയുള്ള ഫ്ലോട്ടിങ് സോളര് പദ്ധതിക്കു തറക്കല്ലിട്ടതെന്നും പ്രധാനമന്ത്രി പറഞ്ഞു. ദേശീയപാത 66ലെ തലപ്പാടി- ചെങ്കള ഭാഗത്തെ ആറുവരിപ്പാതയും കോഴിക്കോട് ബൈപാസിന്റെ വെങ്ങളം രാമനാട്ടുകര ആറുവരിപ്പാതയും പ്രധാനമന്ത്രി ഉദ്ഘാടനം ചെയ്തു.
ഇന്ന് ഉദ്ഘാടനം ചെയ്ത പദ്ധതികളെല്ലാം കര്ഷകര്ക്കും വ്യവസായ മേഖലയ്ക്കും ടൂറിസം മേഖലയ്ക്കും ശക്തിപകരുമെന്ന് പ്രധാനമന്ത്രി മോദി പറഞ്ഞു. അടിസ്ഥാന സൗകര്യ മേഖലയില് ചെലവഴിക്കുന്ന പണം തൊഴിവസരങ്ങള് സൃഷ്ടിക്കുമെന്നും മോദി പറഞ്ഞു. കലൂര് സ്റ്റേഡിയത്തിലെ ചടങ്ങിന് മുമ്പ് മറൈന് ഡ്രൈവില് നടന്ന ധീവരസഭയുടെ സുവര്ണ ജൂബിലി പരിപാടിയിലും പ്രധാനമന്ത്രി പങ്കെടുത്തിരുന്നു. ‘കടലിന്റെ മക്കള്ക്ക് നമസ്കാരം’ എന്നു അഭിസംബോധന ചെയ്താണ് മോദി പ്രസംഗം ആരംഭിച്ചത്. ചരിത്രനിമിഷത്തിനാണ് കൊച്ചി സാക്ഷ്യം വഹിക്കുന്നതെന്ന് പ്രധാനമന്ത്രി പറഞ്ഞു. കഴിഞ്ഞ 50 വര്ഷമായി മത്സ്യത്തൊഴിലാളികളുടെ അവകാശത്തിനായി സംഘടന പ്രവര്ത്തിക്കുകയാണെന്നു പ്രധാനമന്ത്രി പറഞ്ഞു. ”ജനങ്ങളുടെ അനുഗ്രഹം തേടാനാണ് താന് എത്തിയത്. കേരള എന്ന പേരു മാറ്റി കേരളം എന്നാക്കണമെന്ന് ജനങ്ങളുടെ ആഗ്രഹമായിരുന്നു. അതിന് കേന്ദ്രസര്ക്കാര് അനുമതി നല്കി. അതിന്റെ സന്തോഷം ജനങ്ങളുടെ മുഖത്ത് എനിക്ക് കാണാമെന്നും പ്രധാനമന്ത്രി പറഞ്ഞു.
തീരദേശ മേഖലയിലെ അടിസ്ഥാന സൗകര്യങ്ങള് മെച്ചപ്പെടുത്താന് കേന്ദ്രസര്ക്കാര് എപ്പോഴും കൂടെയുണ്ടെന്ന് അദ്ദേഹം ഉറപ്പുനല്കി. പ്രളയകാലത്ത് കേരളം കാണിച്ച ഒത്തൊരുമ രാജ്യം കണ്ടതാണെന്നും അത് ഒരിക്കലും മറക്കില്ലെന്നും അദ്ദേഹം കൂട്ടിച്ചേര്ത്തു. കേരളത്തെ കേരളം ആക്കിയതും മത്സ്യത്തൊഴിലാളികള്ക്കായി പദ്ധതികള് നടപ്പിലാക്കിയതും എന്ഡിഎ സര്ക്കാരാണെന്ന് അദ്ദേഹം പറഞ്ഞു. ധീവരസഭയുടെ പ്രവര്ത്തനങ്ങളെ മോദി പ്രത്യേകം അഭിനന്ദിച്ചു.
മത്സ്യത്തൊഴിലാളികള്ക്കായി കേന്ദ്രസര്ക്കാര് പ്രത്യേക മന്ത്രാലയം രൂപീകരിച്ചുവെന്ന് പ്രധാനമന്ത്രി പറഞ്ഞു. കേരളത്തിന്റെ മത്സ്യമേഖലയ്ക്കായി 1400 കോടി രൂപയാണ് കേന്ദ്രം മാറ്റിവച്ചിരിക്കുന്നത്. അതുകൊണ്ടാണ് മത്സ്യമേഖല വേഗം വളരുന്നത്. മത്സ്യത്തൊഴിലാളികളുടെ സുരക്ഷ വളരെ പ്രധാനമാണ്. ഉപഗ്രഹങ്ങളുടെ സഹായത്തോടെ മത്സ്യത്തൊഴിലാളികളുടെ സുരക്ഷ വര്ധിപ്പിക്കുന്നതിനുള്ള നടപടി സര്ക്കാര് സ്വീകരിച്ചിട്ടുണ്ടെന്നും പ്രധാനമന്ത്രി പറഞ്ഞു.