കണ്ണൂരില് സിപിഎം-കോണ്ഗ്രസ് സംഘര്ഷം. യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തില് നയിക്കുന്ന ജാഥയ്ക്കിടെ ആയിരുന്നു സംഘര്ഷം. കണ്ണൂര് ജില്ലയിലെ മലപ്പട്ടത്ത് ആയിരുന്നു സിപിഎം-കോണ്ഗ്രസ് പ്രവര്ത്തകര് ഏറ്റുമുട്ടിയത്. രാഹുല് മാങ്കൂട്ടത്തില് നയിക്കുന്ന ജാഥ മലപ്പട്ടം ടൗണില് എത്തിയപ്പോഴാണ് ഇരുവിഭാഗങ്ങള് തമ്മില് സംഘര്ഷം ഉടലെടുത്തത്.
തങ്ങള് അനുമതി വാങ്ങി നടത്തിയ പരിപാടിയില് സിപിഎം പ്രവര്ത്തകരാണ് അതിക്രമം കാട്ടിയതെന്ന് യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തില് പറഞ്ഞു. യൂത്ത് കോണ്ഗ്രസ് പ്രവര്ത്തകരോട് പിരിഞ്ഞുപോകാനാണ് എസിപി ആവശ്യപ്പെട്ടത്. സിപിഎമ്മുകാര് അക്രമം കാട്ടുന്നതിന് യൂത്ത് കോണ്ഗ്രസുകാര് എന്തിനാണ് പിരിഞ്ഞുപോകുന്നതെന്നും രാഹുല് ചോദിച്ചു.
മലപ്പട്ടം സിപിഎം ലോക്കല് കമ്മിറ്റി ഓഫീസിന് മുന്നിലായിരുന്നു ഇരുവിഭാഗങ്ങളും ഏറ്റുമുട്ടിയത്. പൊലീസ് സംഭവസ്ഥലത്ത് എത്തി ഇരുവിഭാഗത്തെയും പിന്തിരിപ്പിക്കാന് ശ്രമിച്ചെങ്കിലും വീണ്ടും സംഘര്ഷം ഉണ്ടായി. സിപിഎം ലോക്കല് കമ്മിറ്റി ഓഫിസായ എ കുഞ്ഞിക്കണ്ണന് സ്മാരക മന്ദിരത്തിന് മുന്നിലാണ് ഇരു വിഭാഗവും സംഘടിച്ചത്.
ജനാധിപത്യ അതിജീവന യാത്ര എന്ന പേരിലാണ് അടുവാപ്പുറും മുതല് മലപ്പട്ടം വരെ രാഹുല് മാങ്കൂട്ടത്തില് എംഎല്എയുടെ നേതൃത്വത്തില് യൂത്ത് കോണ്ഗ്രസ് പദയാത്ര സംഘടിപ്പിച്ചത്.