സംസ്ഥാനത്ത് കോവിഡ് വ്യാപനം രൂക്ഷമായ സാഹചര്യത്തിൽ സമ്പൂർണ ലോക്ഡൗണിലേക്ക് പോകണോ എന്ന കാര്യത്തിൽ മന്ത്രിസഭാ യോഗം ഇന്ന് തീരുമാനമെടുക്കും. പ്രാദേശിക തലത്തിൽ നിയന്ത്രണങ്ങൾ മതിയെന്നും സമ്പൂർണ ലോക്ഡൗണിലേക്ക് പോകേണ്ടതില്ലെന്നുമാണ് നിലവിലെ ധാരണ. നിയമസഭാ സമ്മേളനം മാറ്റി വെച്ചിരിക്കുന്നതിനാൽ ധന ബില്ല് പാസാക്കാൻ ഓർഡിനൻസ് ഇറക്കുന്ന കാര്യത്തിലും ഇന്ന് തീരുമാനമുണ്ടാകും.
വീഡിയോ കോൺഫറൻസിലൂടെയാണ് ഇന്നത്ത പ്രത്യേക മന്ത്രിസഭാ യോഗം നടക്കുന്നത്. സംസ്ഥാന ചരിത്രത്തിൽ ആദ്യമായി ഇന്ന് ഓൺലൈനിൽ മന്ത്രിസഭാ യോഗം ചേരും.രാവിലെ 10-നാണ് യോഗം നിശ്ചയിച്ചിരിക്കുന്നത്. കോവിഡ് നിയന്ത്രണങ്ങളുടെ പശ്ചാത്തലത്തിലാണ് മന്ത്രിസഭ യോഗം ഓൺലൈനായി ചേരുന്നത് മന്ത്രിമാർക്ക് വീട്ടിലോ ഓഫീസിലോ ഇരുന്ന് യോഗത്തിൽ പങ്കെടുക്കാം.
അതേസമയം സമ്പൂർണ ലോക്ക്ഡൗൺ വേണ്ടെന്നാണ് സർക്കാർ വിളിച്ചു ചേർത്ത സർവകക്ഷി യോഗത്തിൽ ധാരണ ഉണ്ടായത്. ഇക്കാര്യം വ്യക്തമാക്കിയ മുഖ്യമന്ത്രി, എന്നാൽ സ്ഥിതിഗതികൾ രൂക്ഷമായാൽ വീണ്ടും അടച്ചിടാൻ മടിക്കില്ലെന്ന് സൂചിപ്പിക്കുകയും ചെയ്തിരുന്നു.
നേരത്തെ കോവിഡ് മൂലം നിയമസഭാ സമ്മേളനം മാറ്റിയിരുന്നു. നിയമസഭാ സമ്മേളനം മാറ്റിയ സാഹചര്യത്തിൽ ധനബിൽ പാസ്സാക്കുന്നതിന് ഓർഡിനൻസ് പുറത്തിറക്കുന്നത് അടക്കം മന്ത്രിസഭായോഗം തീരുമാനമെടുക്കും.