ഇസ്രായേല് ഇറാനില് നടത്തിയ ആക്രമണത്തില് പ്രതികരണവുമായി മുസ്ലീം ലീഗ്. ഇസ്രായേല് നിലപാട് അന്താരാഷ്ട്ര നിയമത്തിന് എതിരാണെന്ന് പികെ കുഞ്ഞാലിക്കുട്ടി പറഞ്ഞു. ഇസ്രായേല് ഉയര്ത്തുന്നത് ഭീഷണിയാണെന്നും ഇറാന്റേത് പ്രതിരോധമാണെന്നും സാദ്ദിഖലി തങ്ങളും അഭിപ്രായപ്പെട്ടു.
നിലമ്പൂരില് നടന്ന വാര്ത്ത സമ്മേളനത്തില് സംസാരിക്കുകയായിരുന്നു ലീഗ് നേതാക്കള്. ഇസ്രായേല് വിഷയം ലോക സമാധാനത്തിന് ഭീഷണിയാണെന്നും ഇസ്രായേല് ചെയ്യുന്നത് അന്താരാഷ്ട്ര മര്യാദയ്ക്ക് എതിരാണെന്നും സാദിഖലി തങ്ങള് കുറ്റപ്പെടുത്തി. അക്രമത്തിന് തുടക്കമിടുന്നത് ഇസ്രായേലാണെന്ന് പികെ കുഞ്ഞാലിക്കുട്ടിയും ആരോപിച്ചു.
നിലമ്പൂരിലെത്തിയ മുഖ്യമന്ത്രി പിണറായി വിജയന് ഭരണപരാജയം മറച്ചുവെക്കാനാണ് മുസ്ലിം ലീഗിനെ വിമര്ശിച്ചതെന്ന് സാദിഖലി തങ്ങള് വിമര്ശിച്ചു. മുന്പ് വെല്ഫയര് പാര്ട്ടി ഇടതു പക്ഷത്തിന് ഒപ്പമായിരുന്നുവെന്നും ഇപ്പോള് അവരാണ് നിലപാട് മാറ്റിയതെന്നും സാദിഖലി തങ്ങള് കുറ്റപ്പെടുത്തി.
നിലമ്പൂരില് യുഡിഎഫിന് വലിയ മുന്നേറ്റമാണുള്ളത്. ഭരണവിരുദ്ധ വികാരം യുഡിഎഫിന്റെ മുന്നേറ്റത്തിന് ഒരു കാരണമാണ്. സെമി ഫൈനലിലെ മുന്നേറ്റം ഫൈനലിലെ വിജയത്തിന് മുതല്കൂട്ടാവുമെന്നും മുസ്ലീം ലീഗ് സംസ്ഥാന പ്രസിഡണ്ട് കൂടിയായ പാണക്കാട് സാദിഖലി ശിഹാബ് തങ്ങള് പറഞ്ഞു.