നാഷ്ണല്‍ ഹെറാള്‍ഡ് കേസില്‍ രാഹുല്‍ഗാന്ധിക്ക് എതിരെയുള്ള ഇ ഡി നടപടിയില്‍ പ്രതിഷേധിച്ച് കോണ്‍ഗ്രസ് നടത്തുന്ന രാജ്ഭവന്‍ മാര്‍ച്ചില്‍ സംഘര്‍ഷം. തിരുവനന്തപുരത്ത് കോണ്‍ഗ്രസ് പ്രവര്‍ത്തകരും പൊലീസും തമ്മില്‍ ഉന്തും തള്ളുമുണ്ടായി. പ്രവര്‍ത്തകര്‍ ബാരിക്കേഡ് മറികടക്കാന്‍ ശ്രമിച്ചതിനെ തുടര്‍ന്നാണ് സംഘര്‍ഷം ഉണ്ടായത്.
കല്ലേറില്‍ വനിത പൊലീസ് ഉള്‍പ്പെടെ രണ്ട് പേര്‍ക്ക് പരിക്കേറ്റു. മൂന്ന് വനിതാ പ്രവര്‍ത്തകരെ പൊലീസ് കസ്റ്റഡിയില്‍ എടുത്തു. സംഘര്‍ഷത്തെ തുടര്‍ന്ന് പൊലീസ് ജലപീരങ്കിയും ഗ്രനേഡും പ്രയോഗിച്ചു. കെപിസിസി അധ്യക്ഷന്‍ കെ. സുധാകരന്‍, പ്രതിപക്ഷ നേതാവ് വി.ഡി സതീശന്‍ തുടങ്ങിയവര്‍ ഉദ്ഘാടനം കഴിഞ്ഞ് മടങ്ങിയ ശേഷമാണ് സംഘര്‍ഷമുണ്ടായത്.
ഒരു ബാരിക്കേഡ് പ്രവര്‍ത്തകര്‍ മറിച്ചിട്ടു. തുടര്‍ന്ന് പൊലീസ് അനുനയ ശ്രമങ്ങള്‍ നടത്തിയെങ്കിലും പ്രകോപനപരമായ മുദ്രാവാക്യം മുഴക്കി പ്രവര്‍ത്തകര്‍ പൊലീസിനെ നേരിടുകയായിരുന്നു. തുടര്‍ന്നാണ് ജലപീരങ്കി പ്രയോഗിച്ചത്. രാഹുല്‍ ഗാന്ധിക്ക് എതിരെ ഇല്ലാത്ത കേസിന്റെ പേരിലാണ് കേന്ദ്രത്തിന്റെ നീക്കമെന്ന് പ്രതിപക്ഷ നേതാവ് വി ഡി സതീശന്‍ പറഞ്ഞു. ഇ ഡി ഡല്‍ഹിയില്‍ ശത്രുക്കളെ വേട്ടയാടുകയാണ്. എം പിമാരെവരെ റോഡില്‍ വലിച്ചിഴച്ച് ഡല്‍ഹി പോലീസ് ക്രൂരമായി മര്‍ദ്ദിച്ചു. കേരളത്തില്‍ മിത്രങ്ങളെ സംരക്ഷിക്കുന്നുവെന്നും അദ്ദേഹം ആരോപിച്ചു.
കോണ്‍ഗ്രസിനെ ഇല്ലാതാക്കി ആധിപത്യം നേടാമെന്ന് ആരും കരുതേണ്ടെന്ന് കെപിസിസി അധ്യക്ഷന്‍ കെ സുധാകരനും പറഞ്ഞു. ഇ ഡിയുടെ നടപടിയില്‍ പ്രതിഷേധിച്ച് കോണ്‍ഗ്രസ് രാജ്യവ്യാപകമായി പ്രതിഷേധം നടത്തുകയാണ്. അതേസമയം കേസില്‍ നാളെയും രാഹുല്‍ ഗാന്ധിയെ ചോദ്യം ചെയ്യും. കഴിഞ്ഞ മൂന്ന് ദിവസങ്ങളിലും തുടര്‍ച്ചയായി ചോദ്യം ചെയ്തിരുന്നു.
