വയനാട് മുണ്ടക്കൈ-ചൂരല്മല ദുരന്തബാധിതരുടെ പുനരധിവാസത്തിനായി എല്സ്റ്റണ് എസ്റ്റേറ്റില് നിര്മ്മിക്കുന്ന ടൗണ്ഷിപ്പിന് മുഖ്യമന്ത്രി പിണറായി വിജയന് തറക്കല്ലിട്ടു. പുനരധിവാസത്തിനായി 402 ഗുണഭോക്താക്കളെയാണ് സര്ക്കാര് തിരഞ്ഞെടുത്തിരിക്കുന്നത്. കല്പ്പറ്റയിലെ എല്സ്റ്റണ് എസ്റ്റേറ്റിലാണ് മുഖ്യമന്ത്രി പദ്ധതിക്ക് തറക്കല്ലിട്ടത്.
പദ്ധതിയുടെ ഉദ്ഘാടന ചടങ്ങില് പ്രിയങ്ക ഗാന്ധി, പ്രതിപക്ഷ നേതാവ് വിഡി സതീശന്, മന്ത്രി കെ രാജന് എന്നിവരും പങ്കെടുത്തു. ഉദ്ഘാടന ചടങ്ങില് ഗുണഭോക്താക്കളും പ്രത്യേക ക്ഷണിതാക്കളായിരുന്നു. 7 സെന്റ് ഭൂമിയില് ആയിരം ചതുരശ്ര അടി വിസ്തീര്ണ്ണമുള്ള വീടുകളാണ് ദുരന്തബാധിതര്ക്കായി നിര്മ്മിക്കുന്നത്.
അതേസമയം എല്സ്റ്റണ് എസ്റ്റേറ്റ് സര്ക്കാരിന്റെ ഭൂമി ഏറ്റെടുക്കലിനെതിരെ ഹൈക്കോടതിയില് ഹര്ജി സമര്പ്പിച്ചിരിക്കുന്നതിനാല് കോടതിവിധി പ്രകാരം പ്രതീകാത്മകമായാണ് 64 ഹെക്ടര് ഭൂമി ഏറ്റെടുത്തിരിക്കുന്നത്. വൈകുന്നേരം 4 മണിക്ക് തന്നെ ചടങ്ങുകള് ആരംഭിച്ചു. നിര്മാണം ഒരു വര്ഷത്തിനുള്ളില് പൂര്ത്തിയാക്കുമെന്ന് റവന്യൂ വകുപ്പ് മന്ത്രി കെ രാജന് പറഞ്ഞു.
വീടുകള്ക്ക് പുറമെ പൊതുസ്ഥാപനങ്ങള്ക്ക് പ്രത്യേക കെട്ടിടങ്ങള്, റോഡ്, അനുബന്ധ സ്ഥാപനങ്ങള്, വ്യാപാര – വാണിജ്യ സൗകര്യങ്ങള് എന്നിവ ടൗണ്ഷിപ്പില് സജ്ജമാക്കും. ഊരാളുങ്കല് ലേബര് കോണ്ട്രാക്ട് കോ- ഓപറേറ്റീവ് സൊസൈറ്റിയാണ് ടൗണ്ഷിപ്പ് നിര്മ്മാണം നടത്തുക. കിഫ്കോണ് കണ്സള്ട്ടന്റ് ഏജന്സിയായി പ്രവര്ത്തിക്കും.