പാലക്കാട് കാട്ടാന ആക്രമണത്തില്‍ മാതൃഭൂമി ന്യൂസ് ക്യാമറമാന് അന്തരിച്ചു. മലപ്പുറം പരപ്പനങ്ങാടി ചെട്ടിപ്പടി സ്വദേശി വത്താന്‍ വീട്ടില്‍ ഉണ്ണിയുടെയും ദേവിയുടെയും മകനാണ് അന്തരിച്ച എവി മുകേഷ്. ഇന്ന് രാവിലെ പാലക്കാട് കൊട്ടേക്കാടുണ്ടായ കാട്ടാന ആക്രമണത്തിലാണ് മുകേഷിന് ജീവന്‍ നഷ്ടമായത്.
കാട്ടാനക്കൂട്ടം പുഴ മുറിച്ചുകടക്കുന്നതിന്റെ ദൃശ്യങ്ങള്‍ പകര്‍ത്തുന്നതിനിടെ അപ്രതീക്ഷിതമായി കാട്ടാന ആക്രമിക്കുകയായിരുന്നു. ഉടന്‍തന്നെ മുകേഷിനെ പാലക്കാട് ജില്ലാ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹം പാലക്കാട് ജില്ലാ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.
ഏറെ കാലമായി ഡല്‍ഹി ബ്യൂറോയില്‍ ജോലി നോക്കിയിരുന്ന മുകേഷ് കഴിഞ്ഞ ഒരു വര്‍ഷമായി പാലക്കാട് ബ്യൂറോയിലാണ് ജോലി ചെയ്തിരുന്നത്. മാതൃഭൂമി ഡോട്ട് കോമില്‍ അതിജീവനം എന്ന പേരില്‍ ലേഖനങ്ങള്‍ പ്രസിദ്ധീകരിച്ചിരുന്നു. ടിഷയാണ് ഭാര്യ.
