ആലുവയിൽ നാണയം കഴിച്ചതിനെ തുടർന്ന് മരിച്ച മൂന്ന് വയസുകാരന്റെ പോസ്റ്റ്മോർട്ടം കഴിഞ്ഞു. കുട്ടി രണ്ട് നാണയങ്ങൾ വിഴുങ്ങിയിരുന്നതായി കണ്ടെത്തി. വൻകുടലിൻറെ ഭാഗത്തായിരുന്നു നാണയങ്ങൾ ഉണ്ടായിരുന്നത്.
ഒരു രൂപയുടെയും 50 പൈസയുടെയും നാണയങ്ങളാണ് കണ്ടെടുത്തത്. അതേസമയം നാണയം വിഴുങ്ങിയതാണ് മരണകാരണമെന്ന് പറയാനാകില്ലെന്നാണ് പ്രാഥമിക നിഗമനം.
ആന്തരികാവയവങ്ങളുടെ പരിശോധനാഫലം വന്നാൽ മാത്രമേ മരണകാരണം വ്യക്തമാകൂ എന്നും പോസ്റ്റ്മോർട്ടം നടത്തിയ ഡോക്ടർമാർ പറഞ്ഞു. കളമശ്ശേരി മെഡിക്കൽ കോളേജിൽ നടത്തിയ പോസ്റ്റ്‍മോർട്ടത്തിന് ശേഷം ബന്ധുക്കൾക്ക് വിട്ടു കൊടുത്തു. മൃതദേഹം സ്വദേശമായ കൊല്ലം പരവൂരിലേക്ക് കൊണ്ടുപോയി.
ആലുവ കടുങ്ങല്ലൂർ സ്വദേശിയായ മൂന്ന് വയസുകാരൻ പൃഥ്വിരാജാണ് ഇന്നലെ മരിച്ചത്. ഒരു രൂപ നാണയം വിഴുങ്ങി 18 മണിക്കൂറിനകമായിരുന്നു മരണം. ചികിത്സാപിഴവ് മൂലമാണ് മരണമെന്ന ആരോപണം കുട്ടിയുടെ ബന്ധുക്കൾ ഉന്നയിച്ചിരുന്നു.