വിനയന്റെ കരിയറിലെ ഏറ്റവും വലിയ ഹിറ്റുകളിൽ ഒന്നായിരുന്നു ആകാശ ഗംഗ. ചിത്രത്തിൻറെ രണ്ടാം ഭാഗം നവംബർ ഒന്നിന് തിയേറ്ററുകളിൽ എത്തും. നീണ്ട കാലത്തെ വിലക്കുകൾക്കും വിവാദങ്ങൾക്കും മാറ്റി നിർത്തലുകൾക്കും ശേഷം വീണ്ടും ബിജറ്റ് സിനിമകളുമായി സംവിധാന രംഗത്തു കൂടുതൽ സജീവമാകുകയാണ് വിനയൻ. മോഹൻലാൽ നായകനായ ഒരു സിനിമയും “നങ്ങേലി”യും ആണ് വിനയന്റെ ഇനി വരാനുള്ള സിനിമകൾ. ഈ സിനിമകളെ കുറിച്ചു ഔദ്യോഗിക വിശദീകരണം നൽകുകയാണ് വിനയൻ തന്റെ ഫെയ്സ്ബുക്ക് പേജിലൂടെ.
മോഹൻലാൽ സംവിധാനം ചെയ്യുന്ന ബറോസിന്റെ ഷൂട്ടിന് ശേഷമായിരിക്കും താനും മോഹൻലാലും ചേർന്നുള്ള സിനിമയുടെ പണികൾ തുടങ്ങുക എന്നാണ് വിനയൻ പറയുന്നത്. പത്തു വർഷത്തെ വിലക്കിനു ശേഷം സിനിമയിലേക്ക് മടങ്ങി വരാൻ സാധിച്ചതിന്റെ സന്തോഷവും വിനയൻ മറച്ചു വെയ്ക്കുന്നില്ല
കുറിപ്പ് വായിക്കാം
“ആകാശഗംഗ 2” നവംബർ ഒന്നിന് റിലീസിന് ഒരുങ്ങുകയാണ്.. അറ്റ്മോസ് സൗണ്ട് മിക്സിങ്ങിൻെറയും ഗ്രാഫിക്സിൻെറയും ജോലികൾ അവസാനഘട്ടത്തിലാണ്..സിനിമാരംഗത്ത് പത്തുവർഷം നീണ്ടു നിന്ന നീചമായ വിലക്കു കാലത്തിനു ശേഷം സ്വയം പോരാടി തിരിച്ചു വന്നപ്പോഴും രാജാമണി എന്ന ഒരു പുതുമുഖ നടനെ ചാലക്കുടിക്കാരൻ ചങ്ങാതിയിലൂടെ അവതരിപ്പിച്ച് വിജയം നേടാനായത് സത്യസന്ധതക്കും നിലപാടുകൾക്കും ലഭിച്ച അംഗീകാരം കൂടിയായി ഞാൻ കാണുന്നു… ജയസൂര്യയെ നായകനാക്കി ഒരു ചിത്രവും മോഹൻലാൽ നായകനായ ഒരു സിനിമയും “നങ്ങേലി”യും ആണ് പ്ലാനിംഗിലുള്ള പ്രോജക്ടുകൾ. ഇതിനിടയിൽ 3d ചിത്രത്തിൻെറ സംവിധാനം കൂടി ശ്രീ മോഹൻലാലിനു നിർവ്വഹിക്കാനുള്ളതുകൊണ്ടു തന്നെ ആ സംരംഭം അടുത്തവർഷം അവസാനമേ നടക്കാൻ ഇടയുള്ളു എന്നാണു തോന്നുന്നത്. ഏതായാലും സിനിമയോടുള്ള എൻെറ വൈകാരികമായ ബന്ധവും അതുതരുന്ന സന്തോഷവും പഴയതിലും ഊർജ്ജ്സ്വലമായി ഇന്നും നിലനിൽക്കുന്നു എന്നതാണു സത്യം.. അതുകൊണ്ടുതന്നെ തികച്ചും പുതുമയാർന്ന ചില സബ്ജക്ടുകൾക്കായി ഞാൻ ശ്രമിക്കുന്നുണ്ട്.. കേരളപ്പിറവി ദിവസം റിലീസു ചെയ്യുന്ന “ആകാശഗംഗ2” വിലും നിരവധി പ്രമുഖ നടൻമാരോടൊപ്പം പുതുമുഖങ്ങളെയും പരീക്ഷിക്കുന്നുണ്ട്.. ചിത്രത്തിൻെറ ആദ്യഭാഗം പോലെ തന്നെ ഈ രണ്ടാം ഭാഗവും പ്രേക്ഷകർക്ക് രസകരവും ഉദ്വേഗ ജനകവും ആയിരിക്കും എന്നു പ്രതീക്ഷിക്കുന്നു..
നല്ലൊരു എൻറർടൈനർ നിങ്ങൾക്കായി കാഴ്ചവയ്കാൻ ശ്രമിക്കുന്നു എന്നതിനപ്പുറം വിനയനെന്ന ചലച്ചിത്രകാരന്എല്ലാ വിഷമഘട്ടങ്ങളിലും കേരളജനത തന്ന സ്നേഹത്തിനും പിന്തുണയ്കും ഒരായിരം നന്ദി പ്രകാശിപ്പിക്കുന്നു..