ഗ്രാമി പുരസ്കാര വേദിയില് ഇന്ത്യന് തിളക്കം. മികച്ച ന്യൂ ഏജ് ആല്ബം വിഭാഗത്തിലാണ് ഇന്ത്യന്-അമേരിക്കന് ഗായികയും സംരംഭകയുമായ ചന്ദ്രിക ടണ്ഠന് ഒരുക്കിയ ‘ത്രിവേണി’ പുരസ്കാരം നേടിയിരിക്കുന്നത്. ചന്ദ്രിക ടണ്ഠന്, വൗട്ടര് കെല്ലര്മാന്, എരു മാറ്റ്സുമോട്ടോ എന്നിവര് ചേര്ന്നൊരുക്കിയ ആല്ബമാണ് ത്രിവേണി.
പെപ്സികോയുടെ മുന് സിഇഒ ഇന്ദ്ര നൂയിയുടെ മൂത്ത സഹോദരിയായ ചന്ദ്രിക ടണ്ഠന്റെ ആദ്യത്തെ ഗ്രാമി പുരസ്കാരമാണിത്. 2009ല് ‘സോള് കോള്’ എന്ന ആല്ബത്തിന് ചന്ദ്രികയ്ക്ക് ഗ്രാമി നോമിനേഷന് ലഭിച്ചിരുന്നു. പിന്നീട് 2025ല് ആണ് വീണ്ടുമൊരു നോമിനേഷന് ലഭിക്കുന്നത്. ഇത് അതിശയകരമായി തോന്നുന്നു എന്നാണ് പുരസ്കാര നേട്ടത്തിന് ശേഷം അവര് പ്രതികരിച്ചത്.
അതേസമയം, ലോസ് ഏഞ്ചല്സിലാണ് ഗ്രാമി പ്രഖ്യാപന ചടങ്ങുകള് നടക്കുന്നത്. കാട്ടുതീയില് ദുരിതം അനുഭവിക്കുന്ന ജനതയെ സ്മരിച്ചു കൊണ്ടാണ് ഗ്രാമി പ്രഖ്യാപന ചടങ്ങുകള് ആരംഭിച്ചത്. ഹാസ്യതാരവും എഴുത്തുകാരനും നടനും അവതാരകനുമായ ട്രെവര് നോവ ആണ് പ്രഖ്യാപനം നടത്തിയത്. 94 വിഭാഗങ്ങളിലേക്കാണ് മത്സരം നടന്നത്.
ചരിത്ര നേട്ടവുമായി ബിയോണ്സി മികച്ച കണ്ട്രി ആല്ബത്തിനുള്ള ഗ്രാമി നേടി. ഈ പുരസ്കാരം നേടുന്ന ആദ്യ കറുത്ത വംശജയാണ് ബിയോണ്സി. അവിശ്വസനീയ നേട്ടമെന്നായിരുന്നു പുരസ്കാരം സ്വീകരിച്ചു കൊണ്ട് ബിയോണ്സി പ്രതികരിച്ചത്. കൗബോയ് കാര്ട്ടറിലൂടെയാണ് ബിയോണ്സി ഈ നേട്ടം സ്വന്തമാക്കിയത്.