തിയേറ്ററുകളില് റീ റിലീസ് ചെയ്ത മീര ജാസ്മിന്-പവന് കല്യാണ് ചിത്രം ‘ഗുഡുംബ ശങ്കര്’ ആഘോഷമാക്കി തെലുങ്ക് പ്രേക്ഷകര്. പവന് കല്യാണിന്റെ ജന്മദിനത്തോട് അനുബന്ധിച്ചാണ് ചിത്രം തിയേറ്ററുകളില് എത്തിയത്. മീര ജാസ്മിന്റെ പ്രകടനത്തെ പുകഴ്ത്തി കൊണ്ടുള്ള പോസ്റ്റുകളാണ് സോഷ്യല് മീഡിയയില് ഇപ്പോള് നിറയുന്നത്.
മീര ജാസ്മിന് തെലുങ്കിലേക്ക് തിരിച്ചു വരണമെന്നാണ് ആരാധകരുടെ പോസ്റ്റുകള്. 2004ല് പുറത്തിറങ്ങിയ ഗുഡുംബ ശങ്കര് രണ്ട് പതിറ്റാണ്ടിന് ശേഷമാണ് വീണ്ടു എത്തിയത്. പവന് കല്യാണ് തന്നെയായിരുന്നു ചിത്രത്തിന്റെ തിരക്കഥ എഴുതിയത്. നാഗേന്ദ്ര ബാബു നിര്മിച്ച ചിത്രം വീരശങ്കര് ബൈരിസെട്ടിയാണ് സംവിധാനം ചെയ്തത്.
ചിത്രം വീണ്ടുമെത്തുന്നതിന്റെ സന്തോഷം നേരത്തെ മീര ജാസ്മിന് സോഷ്യല് മീഡിയയില് പങ്കുവെച്ചിരുന്നു. ഹൃദയത്തിന്റെ നിധിശേഖരത്തില് സൂക്ഷിച്ചിരിക്കുന്ന വിലമതിക്കാനാകാത്ത ഓര്മ്മകളിലേക്ക് ഒരു തിരിഞ്ഞുനോട്ടം എന്ന് പറഞ്ഞുകൊണ്ട് ഗുഡുംബ ശങ്കറിന്റെ ലൊക്കേഷനില് നിന്നുള്ള ചിത്രങ്ങളും താരം പങ്കുവെച്ചിരുന്നു.
പവന് കല്യാണിന്റെ ദയയും സഹാനുഭൂതിയും അനുകമ്പയും കാഴ്ചപ്പാടുകളും തന്റെ ജീവിതത്തിലേയും സിനിമയിലേയും പ്രതിസന്ധി ഘട്ടങ്ങളെ തരണം ചെയ്യുന്നതില് പങ്കുവഹിച്ചുവെന്നും മീര ജാസ്മിന് പറഞ്ഞു. ഈ ഓര്മ്മകള് പങ്കുവെക്കാനായത് ആദരവാണെന്നും മീര ജാസ്മിന് കുറിച്ചിരുന്നു.