മമ്മൂട്ടി ചിത്രം “പ്രീസ്റ്റി”ന്റെ ടീസറിനെ കുറിച്ച് യൂട്യൂബ് ഇന്ത്യയുടെ ട്വീറ്റ്. ഫെബ്രുവരി 27ന് റിലീസ് ചെയ്ത പ്രീസ്റ്റ് ടീസറിന് താഴെ ദുല്‍ഖര്‍ സല്‍മാന്‍ കമന്റ് ചെയ്തിരുന്നു. ഈ കമന്റ് ഷെയര്‍ ചെയ്തു കൊണ്ടുള്ള യൂട്യൂബ് ഇന്ത്യയുടെ ട്വീറ്റ് സോഷ്യല്‍ മീഡിയയില്‍ ശ്രദ്ധ നേടുകയാണ്.
“”എന്തൊരു ടീസറാണ് ഇത്! എല്ലാവരെയും പോലെ ഞാനും ആവേശത്തിലാണ്. ഈ ത്രില്ലര്‍ ബിഗ് സ്‌ക്രീനില്‍ കാണാനായി ഇനി കാത്തിരിക്കാന്‍ വയ്യ. പ്രീസ്റ്റിന്റെ മുഴുവന്‍ ടീമിനും ആശംസകള്‍”” എന്നാണ് ദുല്‍ഖറിന്റെ ട്വീറ്റ്. 17000ല്‍ അധികം ലൈക്കുകളും അഞ്ഞൂറിലധികം റിപ്ലൈകളും കമന്റിന് ലഭിച്ചിട്ടുണ്ട്.
ഈ കമന്റ് പങ്കുവെച്ച് “”ദുല്‍ഖറിന്റെ അതേ വികാരം”” എന്നാണ് യൂട്യൂബ് ഇന്ത്യ ട്വീറ്റ് ചെയ്തിരിക്കുന്നത്. സാനിയ ഇയ്യപ്പനെയും നിഖില വിമലിനെയും ട്വീറ്റില്‍ ടാഗ് ചെയ്തിട്ടുണ്ട്. അതേസമയം, മമ്മൂട്ടിയും മഞ്ജു വാര്യരും ഒന്നിക്കുന്ന ദ പ്രീസ്റ്റിനായി ഏറെ പ്രതീക്ഷയോടെയാണ് ആരാധകര്‍ കാത്തിരിക്കുന്നത്.
എന്നാല്‍ നാളെ റിലീസ് ചെയ്യാനിരുന്ന ചിത്രത്തിന്റെ റിലീസ് തിയതി വീണ്ടും നീട്ടിയിരിക്കുകയാണ്. കോവിഡ് പശ്ചാത്തലത്തില്‍ സെക്കന്‍ഡ് ഷോ ഇല്ലാത്തതും പല വിദേശ രാജ്യങ്ങളിലും തിയേറ്ററുകള്‍ അടഞ്ഞു കിടക്കുന്നതുമാണ് റിലീസ് നീട്ടാന്‍ കാരണമാകുന്നത് എന്നാണ് സംവിധായകന്‍ ജോഫിന്‍ ടി. ചാക്കോയുടെ വാക്കുകള്‍.