ചോല എന്ന ചിത്രത്തിൽ പ്രധാന വേഷത്തിൽ അഭിനയിച്ച അഖിൽ വിശ്വനാഥ് അന്തരിച്ചു. മുപ്പതുകാരനായ അഖിലിനെ വീടിനുള്ളിൽ തൂങ്ങി മരിച്ച നിലയിൽ കണ്ടെത്തുകയായിരുന്നു. സിനിമാപ്രവർത്തകനായ മനോജ് കുമാറാണ് ഫേസ്ബുക്കിലൂടെ അഖിലിന്റെ വിയോഗവാർത്ത പങ്കുവെച്ചത്. എന്ത് പണിയാടാ അഖിലേ നീ കാണിച്ചത് എന്നായിരുന്നു പോസ്റ്റ്. 2019 ൽ സംസ്ഥാന ചലച്ചിത്ര പുരസ്കാരം ലഭിച്ച, സനൽകുമാർ ശശിധരൻ ഒരുക്കിയ ‘ചോല’ എന്ന ചിത്രത്തിലൂടെയാണ് അഖിൽ വിശ്വനാഥ് ശ്രദ്ധ നേടുന്നത്.
അഖിലിന്റെ വിയോഗത്തിൽ അനുശോചനം രേഖപ്പെടുത്തി സംവിധായകൻ സനൽകുമാർ ശശിധരൻ പങ്കുവച്ച കുറിപ്പും വേദനയിലാഴ്ത്തുന്നതായിരുന്നു. ‘ഈ വാർത്ത ഹൃദയം പിളർക്കുന്നതാണ്. ‘ചോല’യിലെ നായകൻ അഖിൽ ആത്മഹത്യ ചെയ്തു എന്ന് കേൾക്കുന്നു. ആ ചെറുപ്പക്കാരൻ ആത്മഹത്യ ചെയ്യുമെന്ന് വിശ്വസിക്കാൻ എനിക്ക് കഴിയുന്നില്ല. വളരെയധികം പ്രതിഭയുള്ള ചെറുപ്പക്കാരനായിരുന്നു അയാൾ. എന്താണ് സംഭവിച്ചത് എന്ന് അയാളുടെ അടുത്ത സുഹൃത്തുക്കൾ തിരക്കുക. അഖിൽ ആത്മഹത്യചെയ്തു എന്ന വാർത്ത ഹൃദയം തകർക്കുന്നു. ഇല്ലായ്മകളുടെ പടുകുഴിയിൽ നിന്ന് സിനിമയിലേക്ക് വന്നതാണയാൾ.
‘ചോല’ എന്ന ഒരൊറ്റ സിനിമ മാത്രം മതിയായിരുന്നു അയാൾക്ക് മലയാള സിനിമയിൽ അഭിനേതാവ് എന്ന നിലയിൽ ചുവടുറപ്പിക്കാൻ. അതുണ്ടായില്ല. ആ സിനിമയെ ഒതുക്കിയതോടെ ആ ചെറുപ്പക്കാരൻ ഉൾപ്പെടെ ആ സിനിമയിലൂടെ പ്രതിഭ തെളിയിച്ച നിരവധിപേരുടെ ഭാവി പ്രതീക്ഷകൾ ഇരുട്ടിലായി. അഖിൽ ആത്മഹത്യ ചെയ്തു എന്ന് വിശ്വസിക്കാൻ എനിക്കു കഴിയുന്നില്ല. അയാൾ അടുത്തിടെ തുടങ്ങാനിരിക്കുന്ന ഒടിടി എന്നൊരു സിനിമയിൽ അഭിനയിക്കാൻ തയാറെടുക്കുകയായിരുന്നു എന്നറിയുന്നു. സങ്കടം തോന്നുന്നു അഖിൽ. എന്തായിരുന്നു അകാലത്തിലുള്ള ഈ മരണത്തിൻ്റെ കാരണമെന്ന് എനിക്കറിയില്ല. പക്ഷേ നിന്റെ ചോരയിൽ നിൻ്റെയുൾപ്പെടെയുള്ള മനുഷ്യരുടെ ഭാവി ഇരുട്ടിലാക്കിയവർക്ക് പങ്കുണ്ട്. നിൻ്റ ആത്മാവിന് ശാന്തി ലഭിക്കട്ടെ. സ്നേഹം നിറഞ്ഞ നിൻ്റെ പുഞ്ചിരി വീണ്ടുമെന്നെ തൊടാൻ ഇടയാവട്ടെ.”-സനൽകുമാറിൻ്റ വാക്കുകൾ.