ഉണ്ണി മുകുന്ദന് നായകനാകുന്ന ‘ഗന്ധര്വ്വ ജൂനിയര്’ എന്ന സിനിമയുടെ ചിത്രീകരണം ഈയടുത്ത ദിവസമാണ് ആരംഭിച്ചത്. ‘മാളികപ്പുറം’ എന്ന സിനിമയ്ക്ക് ശേഷം ഉണ്ണി മുകുന്ദന് നായകനാകുന്ന ചിത്രമാണ് ഗന്ധര്വ്വ ജൂനിയര്. മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ അഞ്ച് ഭാഷകളിലായാണ് സിനിമ ഒരുക്കുന്നത്.
ഇതിനിടെ ചിത്രത്തിന്റെ ഒരു ഫാന് മെയ്ഡ് പോസ്റ്റര് ആണ് ഉണ്ണി മുകുന്ദന് ഫെയ്സ്ബുക്കില് പങ്കുവച്ചിരിക്കുന്നത്. ‘ഞാന് ഗന്ധര്വ്വന്’ സിനിമയിലേത് പോലെ കിരീടം ചൂടി ഗന്ധര്വന്റെ രൂപത്തില് നില്ക്കുന്ന ഉണ്ണിയുടെ ചിത്രമാണിത്. ഇതിന് താരം നല്കിയ ക്യാപ്ഷനാണ് ശ്രദ്ധ നേടുന്നത്.
ഈ എഡിറ്റ് തനിക്ക് ഇഷ്ടമായെന്നും എന്നാല് തന്റെ ഗന്ധര്വന് വ്യത്യസ്തനാണെന്നും ഉണ്ണി പറയുന്നു. ‘നിങ്ങള് ഗന്ധര്വ ജൂനിയര് ആസ്വദിക്കുമെന്ന് ഞാന് പ്രതീക്ഷിക്കുന്നു. നിങ്ങളുടെ ഈ പരിശ്രമത്തെ അഭിനന്ദിക്കുന്നു’. ഉണ്ണി ഫെയ്സ്ബുക്കില് കുറിച്ചു.
പോസ്റ്റിന് താഴെ കമന്റുമായി എത്തിയവര്ക്കും ഉണ്ണി മറുപടി നല്കുന്നുണ്ട്. പലര്ക്കും ഉണ്ണി മറുപടിയും നല്കി. പദ്മരാജന്റെ ഗന്ധര്വനെയാണ് പലരും കമന്റുകളില് പരാമര്ശിക്കുന്നത്. എന്നാല് ഇത് പുതിയ തരത്തിലുള്ള ഗന്ധര്വനാണ് എന്നാണ് കമന്റുകളിലും താരം ആവര്ത്തിക്കുന്നത്.
‘സെക്കന്ഡ് ഷോ’, ‘കല്ക്കി’ എന്നീ ചിത്രങ്ങളില് സഹ സംവിധായകനായിരുന്ന വിഷ്ണു ആണ് ഗന്ധര്വ്വ ജൂനിയര് സംവിധാനം ചെയ്യുന്നത്. പ്രവീണ് പ്രഭാറാമും സുജിന് സുജാതനും ചേര്ന്ന് തിരക്കഥ എഴുതുന്ന ചിത്രം ഒരു ഗന്ധര്വ്വന്റെ അപ്രതീക്ഷിത വരവുമായി ബന്ധപ്പെട്ട നര്മ്മ മുഹൂര്ത്തങ്ങളാണ് പറയുക.