സൈജു കുറുപ്പ് കേന്ദ്രകഥാപാത്രമായി എത്തിയ ചിത്രം ഉപചാരപൂർവ്വം ഗുണ്ട ജയന്റെ രണ്ടാം ഭാഗം അണിയറയിൽ ഒരുങ്ങുന്നു. ചിത്രത്തിൻറെ സംവിധായകൻ അരുൺ വൈഗ ഫേസ്ബുക്ക് പോസ്റ്റിലൂടെയാണ് സിനിമയുടെ രണ്ടാം ഭാഗത്തെക്കുറിച്ച് ആരാധകരെ അറിയിച്ചത്. ചിത്രത്തിൻറെ രണ്ടാം ഭാഗത്തിന്റെ സ്ക്രിപ്റ്റിന്റെ ചിത്രവും ഇതിനൊപ്പവും അരുൺ പങ്കുവെച്ചിട്ടുണ്ട്.
“ഈ കർക്കിടക പിറവി ദിനത്തിൽ ഗുണ്ട ജയന്റെ രണ്ടാംവരവിന്റെ സന്തോഷം കൂടി പങ്കുവയ്ക്കുന്നു.നിങ്ങളുടെ പ്രാർത്ഥന ഞങ്ങളോടൊപ്പം ഉണ്ടാവുമെന്ന് പ്രതീക്ഷയോടെ…ഏവർക്കും രാമായണമാസാശംസകൾ” എന്ന കുറുപ്പോടെയാണ് അരുൺ ഫേസ്‌ബുക്കിൽ വിവരം പങ്കുവെച്ചത്.
ഫെബ്രുവരി 25ന് തീയേറ്ററുകളിൽ റിലീസ് ചെയ്ത ചിത്രമായിരുന്നു ഉപചാരപൂർവ്വം ഗുണ്ട ജയൻ. തീയേറ്ററുകളിൽ നിന്ന് ചിത്രത്തിന് സമ്മിശ്ര പ്രതികരണമായിരുന്നു ലഭിച്ചതെങ്കിലും ഒടിടി പ്ലാറ്റ്‌ഫോമിൽ വൻ ശ്രദ്ധയാണ് ചിത്രം നേടിയെടുത്തത്.
വേഫെയര്‍ ഫിലിംസിന്റെ ബാനറില്‍ ദുല്‍ഖര്‍ സല്‍മാനും മൈ ഡ്രീംസ് എന്റര്‍ടൈന്‍മെന്റിന്റെ ബാനറില്‍ സെബാബ് ആനിക്കാടും ചേര്‍ന്നാണ് ചിത്രം നിര്‍മ്മിച്ചിത്. രാജേഷ് വര്‍മ്മയുടേതാണ് ചിത്രത്തിന്റെ തിരക്കഥ. സൈജു കുറുപ്പിന്റെ നൂറാമത് ചിത്രം കൂടിയായിരുന്നു ‘ഉപചാരപൂർവ്വം ഗുണ്ട ജയൻ.
ചിത്രത്തില്‍ സൈജു കുറുപ്പ്, സിജു വില്‍സണ്‍, ശബരീഷ് വര്‍മ്മ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ജോണി ആന്റണി, സാബുമോന്‍, സുധീര്‍ കരമന, ജാഫര്‍ ഇടുക്കി, ബിജു സോപാനം, വിജിലേഷ്, ബൈജു എഴുപുന്ന, സാഗര്‍ സൂര്യ, ഷാനി ഷാക്കി, വൃന്ദ മേനോന്‍, നയന, പാര്‍വതി, ഷെലജ പി അമ്പു തുടങ്ങിയവരും ചിത്രത്തിൽ വിവിധ വേഷങ്ങളിലെത്തിയിരുന്നു.