ചിരഞ്ജീവി നായകനായെത്തിയ “സെയ് റാ നരസിംഹ റെഡ്ഡി” നൂറ് കോടിയും പിന്നിട്ട് ബോക്‌സോഫീസുകളില്‍ തരംഗം സൃഷ്ടിച്ച് മുന്നോട്ട് കുതിക്കുകയാണ്. ബോക്‌സോഫീസ് കളക്ഷന്‍ പങ്കുവച്ചെത്തിയിരിക്കുകയാണ് റാം ചരണ്‍. ഹൈദരാബാദിലെ നിസാംപെറ്റില്‍ മാത്രം 17.18 കോടിയാണ് നാല് ദിവസത്തിനുള്ളില്‍ നേടിയത്.
ആദ്യ ദിനം 8.10 കോടി, രണ്ടാം ദിനം 3.98 കോടി, മൂന്നാം ദിനം 2.54 കോടി, നാലാം ദിനം 2.56 കോടി മൊത്തം 17.18 കോടി എന്നിങ്ങനെയാണ് കണക്കുകള്‍. 250 കോടി മുതല്‍ മുടക്കില്‍ ഒരുക്കിയ ചിത്രം ഒക്ടോബര്‍ 2നാണ് തീയേറ്ററുകളിലേക്ക് എത്തിയത്. തെലുങ്ക്, തമിഴ്, മലയാളം ഹിന്ദി എന്നീ നാല് ഭാഷകളിലായാണ് ചിത്രം റിലീസ് ചെയ്തത്.
സുരേന്ദര്‍ റെഡ്ഡി സംവിധാനം ചെയ്ത സെയ് റാ കോനിഡെല്ലാ പ്രൊഡക്ഷന്‍സിന്റെ കീഴില്‍ റാംചരണാണ് നിര്‍മാണം. ചിരഞ്ജീവിയുടെ 151ാമത് ചിത്രമാണ് സെയ് റാ. അമിതാഭ് ബച്ചന്‍, ജഗപതി ബാബു, നയന്‍താര, വിജയ് സേതുപതി, തമന്ന, അനുഷ്‌ക്ക ഷെട്ടി, കിച്ച സുദീപ്, ബ്രഹ്മാജി, രവി കിഷന്‍, ഹുമ ഖുറേഷി എന്നിങ്ങനെ വന്‍ താരനിരയാണ് ചിത്രത്തിലെത്തിയത്. ആര്‍ രത്‌നവേലു ഛായാഗ്രഹണം നിര്‍വഹിക്കുന്ന ചിത്രത്തിന് അമിത് ത്രിവേദിയാണ് സംഗീത സംവിധാനം.