ഡിസംബര് 30ന് റിലീസ് പ്രഖ്യാപിച്ചിരുന്ന ‘ജിന്ന്’ ചിത്രം തിയേറ്ററുകളില് എത്താതില് പ്രതികരിച്ച് സംവിധായകന്. ഒഴിവാക്കാന് കഴിയാത്ത ചില സാങ്കേതിക പ്രശ്നങ്ങള് കാരണമാണ് ചിത്രം തിയേറ്ററുകളിലെത്തിക്കാന് സാധിക്കാഞ്ഞത് എന്നാണ് സിദ്ധാര്ഥ് ഭരതന് പറയുന്നത്.
”പ്രിയപ്പെട്ടവരെ, ഒഴിവാക്കാന് കഴിയാത്ത ചില സാങ്കേതിക പ്രശ്നങ്ങള് കാരണം ജിന്ന് എന്ന ചിത്രത്തിന്റെ റിലീസ് ഇന്നുണ്ടായില്ല. പ്രശ്നം പരിഹരിച്ച് സിനിമ ഇറക്കാന് ഞങ്ങള് ശ്രമിച്ചുവെങ്കിലും അതിന് സാധിച്ചില്ല. നിങ്ങള്ക്ക് നേരിട്ട ബുദ്ധിമുട്ടുകള്ക്ക് ഞങ്ങള് ക്ഷമ ചോദിക്കുന്നു. പുതിയ റിലീസ് തിയതി വൈകാതെ അറിയിക്കുന്നതായിരിക്കും” എന്നാണ് സിദ്ധാര്ഥ് ഫെയ്സ്ബുക്കില് കുറിച്ചിരിക്കുന്നത്.
ലാലപ്പന് എന്ന മനുഷ്യന്റെ താളം തെറ്റിയ മനസിന്റെ സഞ്ചാരമാണ് ജിന്ന് പറയുന്നത്. സൗബിന് ഷാഹിര് നായകനാകുന്ന ചിത്രത്തില് ശാന്തി ബാലചന്ദ്രന്, ഷൈന് ടോം ചാക്കോ, നിഷാന്ത് സാഗര്, സാബു മോന്, ലിയോണ ലിഷോയ്, ഷറഫുദ്ദീന്, കെപിഎസി ലളിത, ജാഫര് ഇടുക്കി എന്നിവരും വേഷമിടുന്നുണ്ട്.
സ്ട്രേറ്റ് ലൈന് സിനിമാസിന്റെ ബാനറില് സുധീര് വി.കെ., മനു വലിയവീട്ടില് എന്നിവരാണ് ചിത്രം നിര്മ്മിക്കുന്നത്. ‘കലി’ എന്ന ചിത്രത്തിന് ശേഷം രാജേഷ് ഗോപിനാഥ് തിരക്കഥ ഒരുക്കുന്ന ചിത്രത്തിന്റെ ഛായാഗ്രഹണം ഗിരീഷ് ഗംഗാധരനാണ്. സംഗീതം ഒരുക്കുന്നത് പ്രശാന്ത് പിള്ളയാണ്.