നിര്‍മ്മാതാക്കള്‍ നടന്‍ ഷെയ്ന്‍ നിഗത്തിന് ഏര്‍പ്പെടുത്തിയ വിലക്ക് ഒത്തുതീര്‍പ്പിലേക്ക് എത്താന്‍ സാദ്ധ്യത. വെയില്‍, കുര്‍ബാനി എന്നീ സിനിമകളുടെ ഷൂട്ടിംഗ് മുടങ്ങിയതിന് നിര്‍മ്മാതാക്കള്‍ക്ക് നഷ്ടപരിഹാരം നല്‍കാനുള്ള സന്നദ്ധത ഷെയ്ന്‍ നിഗം അറിയിച്ചു. രണ്ട് സിനിമകള്‍ക്കുമായി 32 ലക്ഷം രൂപ നല്‍കാം എന്നാണ് ഷെയ്ന്‍ അറിയിച്ചിരിക്കുന്നത്.
നടീ-നടന്‍മാരുടെ സംഘടനയായ അമ്മയുടെ എക്സിക്യൂട്ടീന് യോഗത്തിലാണ് തീരുമാനം. പ്രശ്നങ്ങളെല്ലാം നല്ലരീതിയില്‍ അവസാനിക്കുമെന്ന് അമ്മ പ്രസിഡന്റ് മോഹന്‍ലാല്‍ പറഞ്ഞു. പ്രശ്‌ന പരിഹാരത്തിനായി നിര്‍മ്മാതാക്കള്‍ ആവശ്യപ്പെട്ട നഷ്ടപരിഹാര തുക നല്‍കാന്‍ കഴിയില്ലന്നായിരുന്നു നേരത്തെ സംഘടനയുടെ നിലപാട്.
അമ്മ ഭാരവാഹികള്‍ നിര്‍മ്മാതാക്കളുമായി അനൗദ്യോഗിക ചര്‍ച്ചകള്‍ നടത്തിയിരുന്നു. നേരത്തെ ഒരു കോടി രൂപ നഷ്ട പരിഹാരം ഷെയ്ന്‍ നല്‍കണമെന്നായിരുന്നു നിര്‍മ്മാതാക്കളുടെ സംഘടന ആവശ്യപ്പെട്ടിരുന്നത്.
എന്നാല്‍ ഇത്രയും തുക നല്‍കാനാകില്ലെന്ന് അമ്മ നിലപാട് സ്വീകരിച്ചതോടെയാണ് ചര്‍ച്ചകള്‍ വഴി മുട്ടിയത്.