രഞ്ജി പണിക്കറിന്റെ സംവിധാനത്തില് ഫഹദ് ഫാസിലിന്റെ പുതിയ ചിത്രം വരുന്നു. 16 വര്ഷത്തെ ഇടവേളയ്ക്ക് ശേഷമാണ് രഞ്ജി പണിക്കര് സംവിധാനം ചെയ്യാനൊരുങ്ങുന്നത്. ഗുഡ്വില് എന്റര്ടെയ്ന്മെന്റ്സിന്റെ ബാനറില് ജോബി ജോര്ജ് തടത്തില് ആണ് ചിത്രം നിര്മ്മിക്കുന്നത്. ഫഹദിന്റെ 41-ാം പിറന്നാള് ദിനത്തിലാണ് പ്രഖ്യാപനം എത്തിയിരിക്കുന്നത്.
ഒരു മിനിറ്റ് ദൈര്ഘ്യമുള്ള വീഡിയോ പങ്കുവച്ചു കൊണ്ടാണ് പ്രഖ്യാപനം. സിനിമയുടെ ടൈറ്റില് ഉടന് പ്രഖ്യാപിക്കുമെന്ന് നിര്മ്മാതാക്കള് അറിയിച്ചു. ഷാജി കൈലാസ്, ജോഷി എന്നീ സംവിധായകന്മാരുടെ സിനിമകള്ക്ക് തിരക്കഥ ഒരുക്കിയാണ് രഞ്ജി പണിക്കര് സിനിമാരംഗത്തേക്ക് എത്തുന്നത്.
ഷാജി കൈലാസ് സംവിധാനം ചെയ്ത കമ്മീഷ്ണര് സിനിമയുടെ സീക്വലായ ഭരത് ചന്ദ്രന് ഐപിഎസ് സംവിധാനം ചെയ്തു കൊണ്ട് 2005ല് ആണ് സംവിധായകനായി അരങ്ങേറ്റം കുറിച്ചത്. 2008ല് പുറത്തിറങ്ങിയ രൗദ്രം ആണ് രഞ്ജി പണിക്കര് ഒടുവില് സംവിധാനം ചെയ്ത് എത്തിയ ചിത്രം.
അതേസമയം, ജിത്തു മാധവന് സംവിധാനം ചെയ്ത ആവേശം ആണ് ഫഹദിന്റെതായി അവസാനം മലയാളത്തില് പ്രദര്ശനത്തിനെത്തിയ ചിത്രം. പുഷ്പ 2, മാരീചന്, വേട്ടൈയന്, ഓടും കുതിര ചാടും കുതിര, ബൊഗെയ്ന്വില്ല, ഡോണ്ട് ട്രബിള് ദി ട്രബിള് എന്നീ സിനിമകളാണ് ഫഹദിന്റെതായി വിവിധ ഭാഷകളിലായി ഒരുങ്ങി കൊണ്ടിരിക്കുന്നത്.