മൂന്ന് കോടി രൂപയോളം ഓണ്‍റോഡ് വില വരുന്ന റേഞ്ച് റോവര്‍ നിരയിലെ വേഗ് മോഡല്‍ സ്വന്തമാക്കിയതിന് പിന്നാലെ മറ്റൊരു ആഡംബര കാര്‍ സ്വന്തമാക്കി കൂടി ഗാരേജിലെത്തിച്ച് പൃഥ്വിരാജ്. ബിഎംഡബ്‌ള്യൂവിന്റെ എം 760 മോഡലാണ് പൃഥ്വിരാജ് സ്വന്തമാക്കിയത്. വിലയില്‍ 30 ലക്ഷം രൂപയുടെ വ്യത്യാസം കണ്ടതിനെ തുടര്‍ന്ന് കാറിന്റെ രജിസ്ട്രേഷന്‍ തടഞ്ഞിരുന്നു. നികുതിയുടെ ബാക്കി തുകയായ 9,54,350 രൂപയും അടച്ചാണ് പൃഥ്വിരാജ് കാറിന്റെ രജിസ്ട്രേഷന്‍ പൂര്‍ത്തിയാക്കിയത്.
1.64 കോടി രൂപയുടെ ആഡംബര കാര്‍ താല്‍ക്കാലിക റജിസ്ട്രേഷനു വേണ്ടി എറണാകുളം ആര്‍ടി ഓഫിസില്‍ ഓണ്‍ലൈനില്‍ നല്‍കിയ അപേക്ഷയ്ക്കൊപ്പം സമര്‍പ്പിച്ച ബില്ലില്‍ വില 1.34 കോടി രൂപയെന്നാണ് രേഖപ്പെടുത്തിയിരുന്നത്. ഇതിന്റെ അടിസ്ഥാനത്തിലുള്ള റോഡ് നികുതിയും അടച്ചു. ഉദ്യോഗസ്ഥരുടെ പരിശോധനയില്‍ വാഹനത്തിന്റെ യഥാര്‍ഥ വില 1.64 കോടിയെന്നു കണ്ടെത്തി. തുടര്‍ന്നാണ് റജിസ്ട്രേഷന്‍ തടഞ്ഞത്.
30 ലക്ഷം രൂപ “സെലിബ്രിറ്റി ഡിസ്‌കൗണ്ട്” ഇനത്തില്‍ വില കുറച്ചു നല്‍കിയതാണെന്ന് വാഹനം വിറ്റ സ്ഥാപനത്തിന്റെ പ്രതിനിധികള്‍ അറിയിച്ചത്. എന്നാല്‍ ഡിസ്‌കൗണ്ട് നല്‍കിയാലും ആഡംബര കാറുകള്‍ക്കു യഥാര്‍ഥ വിലയുടെ 21 ശതമാനം നികുതി അടയ്ക്കണമെന്നാണ് നിയമം. ഇതോടെ ഒമ്പത് ലക്ഷത്തോളം രൂപ കൂടി അടയ്ക്കാതെ റജിസ്ട്രേഷന്‍ ചെയ്യാനാകില്ലെന്ന് മോട്ടര്‍ വാഹന വകുപ്പ് അറിയിക്കുകയായിരുന്നു.