ആന്റോ ജോസഫിന്റെ നിര്‍മ്മാണത്തില്‍ അഭിലാഷ് പിള്ളയുടെ രചനയില്‍ വൈശാഖ് സംവിധാനം ചെയ്യുന്ന പുതിയ ചിത്രമാണ് നൈറ്റ് ഡ്രൈവ്. റോഷന്‍ മാത്യു, അന്ന ബെന്‍, ഇന്ദ്രജിത്ത് സുകുമാരന്‍ തുടങ്ങിയവരാണ് ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്. ചിത്രത്തിന്റെ ടൈറ്റില്‍ പോസ്റ്റര്‍ പുറത്ത് വിട്ടിരിക്കുകയാണ് ഇപ്പോള്‍.
സംവിധായകന്‍ തന്നെയാണ് പോസ്റ്റര്‍ പുറത്ത് വിട്ടിരിക്കുന്നത്. നടന്‍ ഷാജു ശ്രീധറും ചിത്രത്തില്‍പ്രധാന കഥാപാത്രത്തെ അവതരിപ്പിക്കുന്നുണ്ട്. ഷാജു ചിത്രത്തിന്റെ ലൊക്കേഷനില്‍ നിന്നും റോഷന്‍ മാത്യുവുമായി നില്‍ക്കുന്ന ഒരു ചിത്രം സോഷ്യല്‍ മീഡിയ വഴി പങ്കുവെച്ചിട്ടുമുണ്ട്.
ചിത്രത്തിന്റെ പ്രഖ്യാപനം നടത്തിക്കൊണ്ട് വൈശാഖ് ഫേസ്ബുക്കില്‍ കുറിച്ചത് ഇങ്ങനെയാണ്. ‘വളരെ ആവേശത്തിലാണ്… ! മല്ലു സിംഗിന് ശേഷം ആന്‍ മെഗാ മീഡിയയുമായി സഹകരിക്കുകയാണ്. ‘നൈറ്റ് ഡ്രൈവ്’ എന്ന് പേരിട്ടിരിക്കുന്ന എന്റെ പുതിയ സംവിധാന സംരംഭം ഇന്ന് ആരംഭിക്കുന്നു.
രണ്ട് വര്‍ഷമായി അഭിലാഷ് പിള്ള എന്നോട് തിരക്കഥ വിവരിക്കുന്നു, അത് ചെയ്യണമെന്ന വലിയ ആഗ്രഹത്തിലായിരുന്നു ഞാന്‍. അഭിലാഷ് ഇത്രയും കാലം എന്നെ കാത്തിരുന്നതിന് വളരെ നന്ദി, പ്രിയ വേണുവിനും, നീതാ പിന്റോയ്ക്കും ഈ സിനിമ നിര്‍മ്മിക്കുന്നതിന് വളരെ നന്ദി.
റോഷന്‍ മാത്യു, ഇന്ദ്രജിത്ത് സുകുമാരന്‍, അന്ന ബെന്‍ എന്നിവര്‍ക്ക് എന്നില്‍ വിശ്വാസമുണ്ടായിരുന്നതിനും ഈ പ്ലാനിനോടൊപ്പം ചേര്‍ന്നതിനും ഒരു വലിയ നന്ദി. മുഴുവന്‍ ക്രൂവിനോടും അഭിനേതാക്കളോടും സാങ്കേതിക വിദഗ്ധരോടും നന്ദിയെന്നും അവര്‍ വളരെ നന്ദിയുള്ളവരാണെന്നും അവരെല്ലാവരും എന്റെ കുടുംബമാണെന്നും വൈശാഖ് കുറിച്ചു.