കുറുപ്പില് ഭാസി പിള്ളയായി എത്തിയ ഷൈന് ടോം ചാക്കോയെ പ്രശംസിച്ച് നടന് മുരളി ഗോപി. ഇപ്പോഴാണ് ഭാസിപിള്ളയെ കാണാന് സാധിച്ചത്. ചെയ്ത കഥാപാത്രത്തിന്റെ പേരില് അറിയപ്പെടാന് സാധിക്കുക എന്നതാണ് അഭിനേതാവിന് ലഭിക്കുന്ന പാവന പുരസ്കാരമെന്നും ആ നിലയില് ഷൈന് പുരസ്കൃതനാണെന്നും മുരളി ഗോപി ഫെയ്സ്ബുക്കില് കുറിച്ചു.
ഫെയ്സ്ബുക്ക് കുറിപ്പ്
‘വൈകി എന്നറിയാം. പക്ഷെ ഇപ്പോഴാണ് ഭാസിപിള്ളയെ കാണാന് സാധിച്ചത്. ചെയ്ത കഥാപാത്രങ്ങളുടെ പേരില് അറിയപ്പെടാന് സാധിക്കുക എന്നതാണ് ഒരു അഭിനേതാവിന് കിട്ടുന്ന ഏറ്റവും, അല്ലെങ്കില്, ഒരേയൊരു പാവന പുരസ്കാരം. ആ നിലയില്, ഇതിനു മുമ്പും ഷൈന് പുരസ്കൃതനാണ്. ഇത് ഒരു സ്വര്ണപ്പതക്കവും.
‘ഗദ്ദാമ’യില് അരങ്ങേറ്റം കുറിക്കുമ്പോള് ഒപ്പം ഉണ്ടായിരുന്നവന് എന്ന നിലയിലും, ഒരു ജ്യേഷ്ഠസഹോദരന് എന്ന നിലയിലും അഭിമാന നിമിഷം. ഇനിയും വലിയ ഉയര്ച്ചകള് ഉണ്ടാകട്ടെ എന്ന് പ്രാര്ത്ഥന.’
അതേസമയം, കുറുപ്പ് നെറ്റ്ഫ്ളിക്സില് പ്രദര്ശനം നടന്നു കൊണ്ടിരിക്കുകയാണ്. ഡിസംബര് 15 നാണ് സ്ട്രീമിംഗ് ഒടിടിയില് ആരംഭിച്ചത്. നവംബര് 12നായിരുന്നു ചിത്രം തിയേറ്ററുകളില് പ്രദര്ശനത്തിനെത്തിയത്. റിലീസിന് ശേഷം രണ്ടാഴ്ച കൊണ്ട് ആഗോളതലത്തില് ചിത്രം 75 കോടി ഗ്രോസ് നേടിയെന്ന് അണിയറപ്രവര്ത്തര് അറിയിച്ചിരുന്നു. ആദ്യ ദിവസത്തെ മാത്രം കളക്ഷന് ആറ് കോടി രൂപക്ക് മുകളിലായിരുന്നു.