സ്റ്റാര്ഡവും സൂപ്പര് സ്റ്റാര്ഡവും കടന്ന് ഇന്ത്യന് സിനിമയുടെ ഐക്കണ് എന്ന നിലയില് വളര്ന്നു നില്ക്കുന്ന രജിനികാന്തിന്റെ പ്രഭാവം പതിയെ മങ്ങുന്ന കാഴ്ചയാണ് കഴിഞ്ഞ കുറച്ച് വര്ഷങ്ങളായി കണ്ടത്. 2010ല് എത്തിയ ‘എന്തിരന്’ സിനിമയ്ക്ക് ശേഷം അധികം ഹിറ്റുകള് താരത്തിന്റെ കരിയറില് ഉണ്ടായിട്ടില്ല. കൊച്ചടയാന്, ലിംഗ എന്നീ സിനിമകള് തിയേറ്ററില് ഫ്ളോപ്പ് ആയിരുന്നു. കബാലി, കാല, 2.0, പേട്ട, ദര്ബാര്, അണ്ണാത്തെ എന്നീ സിനിമകള്ക്ക് ശരാശരി വിജയം മാത്രമാണ് തിയേറ്ററില് നിന്നും ലഭിച്ചത്.
അതുകൊണ്ട് തന്നെ ഇനി വരാനിരിക്കുന്ന ‘ജയിലര്’ എന്ന സിനിമയ്ക്കായി പ്രതീക്ഷകള് ഏറെയാണ്. പേര് സൂചിപ്പിക്കുന്നതു പോലെ ഒരു ‘ജയിലര്’ കഥാപാത്രമായി രജനികാന്ത് അഭിനയിക്കുന്ന സിനിമയ്ക്കായി ആരാധകര്ക്ക് വലിയ പ്രതീക്ഷയാണ്. ജയിലറുടെ അപ്ഡേറ്റുകള്ക്ക് എപ്പോഴും വലിയ സ്വീകാര്യത ലഭിക്കാറുണ്ട്. മലയാളി ആരാധകരെയും ആവേശത്തിലാക്കുന്ന ഒരു വാര്ത്തയാണ് ജയിലറെ കുറിച്ച് ഇപ്പോള് സോഷ്യല് മീഡിയയില് പ്രചരിക്കുന്നത്.
രജനികാന്തിനൊപ്പം മോഹന്ലാലും ജയിലറില് എത്തുമെന്നാണ് പുതിയ റിപ്പോര്ട്ടുകള്. സിനിമയില് കാമിയോ റോളില് എത്തുന്ന മോഹന്ലാലിന് രണ്ടോ മൂന്നോ ദിവസത്തെ ഷൂട്ടിംഗ് ആണ് ഉണ്ടാവുക എന്നാണ് ട്രേഡ് അനലിസ്റ്റുകള് അടക്കമുള്ളവര് സോഷ്യല് മീഡിയയില് പങ്കുവച്ചിരിക്കുന്നത്. 8, 9 തിയതികളിലായാണ് മോഹന്ലാലിന്റെ ഷൂട്ടിംഗ് നടക്കുക. രമ്യാ കൃഷ്ണനും പ്രധാന വേഷത്തിലെത്തുന്ന സിനിമയില് കന്നഡ താരം ശിവരാജ്കുമാറും വേഷമിടുന്നുണ്ട്. നെല്സണ് ആണ് ചിത്രം തിരക്കഥ എഴുതി സംവിധാനം ചെയ്യുന്നത്.
സ്റ്റണ്ട് ശിവയാണ് സിനിമയുടെ ആക്ഷന് കൊറിയോഗ്രാഫര്. അനിരുദ്ധ് രവിചന്ദര് സംഗീതം ഒരുക്കും. വിജയ് കാര്ത്തിക് കണ്ണന് ആണ് ഛായാഗ്രാഹണം. റാമോജി റാവു ഫിലിം സിറ്റിയിലും ഒരു കൂറ്റന് സെറ്റ് സിനിമയ്ക്ക് വേണ്ടി ഒരുക്കിയിരുന്നു ‘അണ്ണാത്തെ’യ്ക്ക് ശേഷം എത്തുന്ന രജനികാന്ത് ചിത്രമാണ് ‘ജയിലര്’. രജനികാന്ത് നായകനാകുന്ന സിനിമ ആയതുകൊണ്ടു തന്നെ കോളിവുഡ് കാത്തിരിക്കുന്ന പ്രധാന പ്രോജക്റ്റുകളുടെ നിരയില് ‘ജയിലര്’ ആദ്യ സ്ഥാനത്ത് തന്നെ ഇടംപിടിച്ചിട്ടുണ്ട്. സണ് പിക്ചേഴ്സിന്റെ ബാനറില് കലാനിധി മാരനാണ് സിനിമ നിര്മിക്കുന്നത്.
തിരക്കഥയില് തന്റേതായ സ്വാതന്ത്ര്യമെടുക്കാന് നെല്സണിന് രജനികാന്ത് അനുവാദം നല്കിയിരുന്നുവെന്ന് നേരത്തെ റിപ്പോര്ട്ടുകള് എത്തിയിരുന്നു. ആദ്യ സിനിമയായ ‘കൊലമാവ് കോകില’യിലൂടെ തന്നെ ശ്രദ്ധിക്കപ്പെട്ട സംവിധായകനാണ് നെല്സണ്. കരിയര് ബ്രേക്ക് നല്കിയത് ശിവകാര്ത്തികേയന് നായകനായ ‘ഡോക്ടര്’ ആയിരുന്നു. ഏറ്റവും ഒടുവില് നെല്സണിന്റെ സംവിധാനത്തില് പുറത്തിറങ്ങിയത് വിജയ് ചിത്രമായ ‘ബീസ്റ്റ്’ ആയിരുന്നു. ബീസ്റ്റിനെതിരെ വിമര്ശനങ്ങള് ഉയര്ന്നിരുന്നുവെങ്കിലും സിനിമ ബോക്സോഫീസില് വിജയമായിരുന്നു. ‘ജയിലറി’ലൂടെ വന് തിരിച്ചുവരവ് നടത്താമെന്ന പ്രതീക്ഷയിലാണ് നെല്സണ് ഇപ്പോള്. അതുപോലെ തന്നെ പ്രതീക്ഷയിലാണ് രജനി ആരാധകരും.
വെറുതേ നടക്കുന്നതും, ഒരു സിഗരറ്റ് വലിയ്ക്കുന്നതും, തന്റെ വിരല് ചൂണ്ടുന്നതു പോലും രജനികാന്തിനെ ‘സ്റ്റൈല് ഐക്കണ്’ ആക്കിമാറ്റി. രജനികാന്ത് എന്ന ബ്രാന്ഡ് ജനിച്ചത് അങ്ങനെയൊക്കെയാണ്. ആക്ഷനുകളും സംഭാഷണങ്ങളും.. എല്ലായിടത്തുമുണ്ട് രജനി ടച്ച്. ആ പഴയ, അതേ മാസ്മരിക പ്രകടനവുമായി സ്റ്റൈല്മന്നന് ജയിലറില് എത്തുമെന്ന് തന്നെയാണ് പ്രതീക്ഷ.