തല അജിത്ത് പ്രധാനവേഷത്തിലെത്തുന്ന എച്ച് വിനോദ് ചിത്രമാണ് തുനിവ്. ഒരു ഹെയ്സ്റ്റ് ത്രില്ലറായി ഒരുക്കുന്ന ഈ ചിത്രം അടുത്ത വര്ഷം ജനുവരിയില് പൊങ്കല് റിലീസായാണ് പ്രേക്ഷകര്ക്ക് മുന്നിലെത്തുക. മലയാളത്തിന്റെ ലേഡി സൂപ്പര് സ്റ്റാര് മഞ്ജു വാര്യരാണ് സിനിമയില് നായികാ വേഷം ചെയ്യുന്നത്.
വെട്രിമാരന്- ധനുഷ് ടീമിന്റെ അസുരന് ചെയ്തതിനു ശേഷം മഞ്ജു വാര്യര് തമിഴില് നായികാ വേഷം ചെയ്യുന്ന ചിത്രം ഇപ്പോഴിതാ ഈ ചിത്രത്തില് ഒരു ഗാനം ആലപിച്ചിരിക്കുകയാണ് മഞ്ജു വാര്യര്. താന് ഈ ചിത്രത്തിന് വേണ്ടി പിന്നണി പാടുന്ന വിവരം നടി തന്നെയാണ് കഴിഞ്ഞ ദിവസം സോഷ്യല് മീഡിയയില് പങ്ക് വെച്ചത്. മഞ്ജു വാര്യര് ആദ്യമായി ആലപിക്കുന്ന തമിഴ് ഗാനം കൂടിയായിരിക്കും ഇത്. സൂപ്പര് ഹിറ്റ് സംഗീത സംവിധായകന് ജിബ്രാന് ആണ് ഈ ചിത്രത്തിന് വേണ്ടി സംഗീത സംവിധാനം നിര്വഹിക്കുന്നത്.
അജിത്തും എച്ച് വിനോദും ബിഗ് ബഡ്ജറ്റ് ചിത്രമായ വലിമൈക്ക് ശേഷം ഒന്നിക്കുന്ന ചിത്രമാണ് തുനിവ്. സംവിധായകന് തന്നെ രചനയും നിര്വഹിച്ച ഈ ചിത്രത്തിന്റെ നിര്മ്മാണം നിര്വഹിക്കുന്നത് ബോണി കപൂറാണ്. അദ്ദേഹം തന്നെയാണ് അജിത്- വിനോദ് കൂട്ടുകെട്ടിലെ മുന് ചിത്രങ്ങളായ നേര്ക്കൊണ്ട പാര്വൈ, വലിമൈ എന്നിവ നിര്മ്മിച്ചതും.
നീരവ് ഷാ ക്യാമറ ചലിപ്പിച്ച തുനിവ് എഡിറ്റ് ചെയ്യുന്നത് വിജയ് വേലുകുട്ടിയാണ്. ഈ ചിത്രത്തിലെ അജിത്തിന്റെ ലുക്ക് സോഷ്യല് മീഡിയയില് വൈറലായി മാറിയിരുന്നു. വീര, സമുദ്രക്കനി, ജോണ് കൊക്കെന്, തെലുങ്ക് നടന് അജയ് തുടങ്ങിയവരും തുനിവില് അഭിനയിക്കുന്നുണ്ട്.