സിനിമാ പ്രേക്ഷകര്‍ ഏറെ പ്രതീക്ഷയോടെ കാത്തിരിക്കുന്ന മമ്മൂട്ടിയുടെ ബ്രഹ്മാണ്ഡ ചിത്രം മാമാങ്കം നാളെ തിയേറ്ററുകളിലെത്തുകയാണ്. റിലീസ് അടുത്തതോടെ ചിത്രത്തിന്റെ പ്രമോഷന്‍ പരിപാടികള്‍ പൊടിപൊടിക്കുകയാണ്. ചിത്രത്തില്‍ ഒരു പ്രധാന വേഷത്തില്‍ സുദേവ് നായരും എത്തുന്നുണ്ട്. മാമാങ്കം ഹിന്ദി ഡബ്ബിങ് പതിപ്പിന്റെ പ്രചരണാര്‍ത്ഥം മുംബൈയില്‍ നടന്ന പ്രസ് മീറ്റില്‍ മമ്മൂട്ടിക്കൊപ്പം സുദേവും പങ്കെടുത്തിരുന്നു. അവിടെ വെച്ചു സുദേവ് പറഞ്ഞ വാക്കുകളും അതിനു മമ്മൂട്ടി നല്‍കിയ തിരുത്തലും ആണ് ഇപ്പോള്‍ സോഷ്യല്‍ മീഡിയയില്‍ വൈറല്‍ ആവുന്നത്.
“ഞാന്‍ ഈ സിനിമയുടെ ഒരു ചെറിയ ഭാഗമാണ്”. മമ്മൂട്ടി ഉള്‍പ്പെടുന്ന താരങ്ങള്‍ അണിനിരന്ന വേദിയില്‍, എളിമയോടെ, തന്റെ വേഷത്തെ പറ്റി സംസാരിച്ച് സുദേവ് പറഞ്ഞു. സുദേവ് സംസാരിച്ച് അവസാനിക്കാന്‍ കാത്തിരുന്നത് പോലെ മമ്മൂട്ടി ഉടന്‍ തന്നെ മൈക്ക് എടുത്ത് സംസാരിക്കാന്‍ ആരംഭിച്ചു. രണ്ടു വര്‍ഷം മുന്‍പ് മലയാള സിനിമയിലെ മികച്ച നടനായി തിരഞ്ഞെടുക്കപ്പെട്ട നടനാണ് സുദേവ് എന്നും, ആള് പറയുന്നത് പോലെ ചില്ലറക്കാരനല്ലെന്നും മമ്മൂട്ടി പറഞ്ഞു നിര്‍ത്തി.
https://www.instagram.com/p/B5wuRlGJINd/?utm_source=ig_web_copy_link
എം. പത്മകുമാര്‍ സംവിധാനം ചെയ്യുന്ന ചിത്രം നിര്‍മിക്കുന്നത് വേണു കുന്നപ്പിള്ളിയാണ്. ചിത്രത്തിന്റെ തിരക്കഥ ഒരുക്കിയത് ശങ്കര്‍ രാമകൃഷ്ണന്‍. മലയാളത്തിനു പുറമേ, തമിഴ്, തെലുങ്ക്, ഹിന്ദി ഭാഷകളിലും ചിത്രം റിലീസ് ചെയ്യുന്നുണ്ട്. ഉണ്ണി മുകുന്ദന്‍, കനിഹ, അനു സിത്താര, സിദ്ദീഖ്, തരുണ്‍ അറോറ, സുദേവ് നായര്‍, സുരേഷ് കൃഷ്ണ, രതീഷ് കൃഷ്ണ, പ്രാചി തെഹ്ലാന്‍, മാസ്റ്റര്‍ അച്യുതന്‍ എന്നിവരാണ് ചിത്രത്തിലെ പ്രധാന താരങ്ങള്‍. മനോജ് പിള്ളയാണ് ചിത്രത്തിന്റെ ഛായാഗ്രഹണം നിര്‍വഹിക്കുന്നത്. സംഗീതം എം. ജയചന്ദ്രന്‍.
