അങ്കമാലി ഡയറീസ്, ഈമയൗ എന്നീ ചിത്രങ്ങള്ക്കു ശേഷം ലിജോ ജോസ് പെല്ലിശ്ശേരി സംവിധാനം ചെയ്യുന്ന ചിത്രമാണ് ജല്ലിക്കെട്ട്. പ്രഖ്യാപന വേള മുതല് മികച്ച സ്വീകാര്യത ലഭിച്ച ചിത്രത്തിനായി ആകാംക്ഷയോടെയാണ് സിനിമാപ്രേമികള് കാത്തിരിക്കുന്നത്. ചിത്രത്തിന്റെ ടൈറ്റില് പുറത്തിറങ്ങിയതു മുതല് പ്രേക്ഷക പ്രതീക്ഷകള് വര്ദ്ധിച്ചിരുന്നു. ഇത്തവണയും വ്യത്യസ്തമാര്ന്ന പ്രമേയം പറയുന്ന ചിത്രവുമായിട്ടാണ് ലിജോ എത്തുന്നതെന്നാണ് അറിയുന്നത്.
വമ്പന് റിലീസിന് ഒരുങ്ങുന്ന ജല്ലിക്കെട്ടിന്റെ പുതിയ ചിത്രങ്ങള് സോഷ്യല് മീഡിയയില് വൈറലാവുകയാണ്. ചിത്രത്തിന്റെ ലൊക്കേഷന് സ്റ്റില്ലുകകളാണ് പുറത്തുവന്നിട്ടുണ്ട്. ഗുഹാമനുഷ്യന്റെ ലുക്കിലുള്ള ചെമ്പന് വിനോദിന്റെ ചിത്രവും ആന്റണി വര്ഗീസ്, സാബുമോന് എന്നിവരുടെ ചിത്രങ്ങളും കാഴ്ചക്കാരെ വിസ്മയിപ്പിക്കുന്നതാണ്.
എസ് ഹരീഷിന്റെ മാവോയിസ്റ്റ് എന്ന കഥയെ ആസ്പദമാക്കിയാണ് ജല്ലിക്കെട്ട് ഒരുങ്ങുന്നത്. അറവുശാലയില്നിന്ന് കയര്പൊട്ടിച്ചോടിയ ഒരു പോത്തിന്റേയും എരുമയുടേയും പരാക്രമങ്ങള് പശ്ചാത്തലമാക്കി മനുഷ്യാവസ്ഥയുടെ വര്ത്തമാന ജീര്ണ്ണതയെ വിചാരണ ചെയ്യുന്ന ലക്ഷണമൊത്ത കഥയാണ് “മാവോയിസ്റ്റ്.” എസ് ഹരീഷും ആര് ജയകുമാറും ചേര്ന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. ഓ തോമസ് പണിക്കരാണ് ചിത്രം നിര്മ്മിച്ചിരിക്കുന്നത്. ഗിരീഷ് ഗംഗാദരന് ആണ് ഛായാഗ്രഹണം. സംഗീതം പ്രശാന്ത് പിള്ളയാണ്.