പ്രശസ്ത തിരക്കഥാകൃത്തും ഗ്രന്ഥകാരനുമായ ബല്‍റാം മട്ടന്നൂര്‍ (62) അന്തരിച്ചു. കളിയാട്ടം, കര്‍മ്മയോഗി, സമവാക്യം തുടങ്ങി മലയാളത്തിലെ ഹിറ്റ് സിനിമകളുടെ തിരക്കഥാകൃത്താണ് ബല്‍റാം. സംസ്‌കാരം കണ്ണൂര്‍ പുല്ലുപ്പി സമുദായ ശ്മശാനത്തില്‍ ഇന്ന് രണ്ടു മണിക്ക് നടക്കും.
1997ല്‍ ജയരാജിന്റെ സംവിധാനത്തില്‍ എത്തിയ ‘കളിയാട്ട’ത്തിലൂടെയാണ് ബല്‍റാം സിനിമയില്‍ എത്തുന്നത്. വില്യം ഷേക്‌സ്പിയറിന്റെ വിശ്വപ്രസിദ്ധമായ നാടകം ‘ഒഥല്ലോ’ അടിസ്ഥാനമാക്കിയാണ് തെയ്യത്തിന്റെ പശ്ചാത്തലത്തില്‍ ബല്‍റാം കളിയാട്ടത്തിന്റെ കഥ ഒരുക്കിയത്.
ഷേക്‌സ്പിയറിന്റെ ‘ഹാംലറ്റ്’ അടിസ്ഥാനമാക്കിയാണ് 2012ല്‍ പുറത്തിറങ്ങിയ കര്‍മ്മയോഗിയുടെ തിരക്കഥ ബല്‍റാം രചിച്ചത്. ഇന്ദ്രജിത്ത് നായകനായ ചിത്രം വി.കെ പ്രകാശ് ആണ് സംവിധാനം ചെയ്തത്. 1983ല്‍ മുയല്‍ഗ്രാമം എന്ന ബാലസാഹിത്യത്തിനുള്ള യുവസാഹിതി അവാര്‍ഡും ദര്‍ശനം അവാര്‍ഡും നേടിയിട്ടുണ്ട്.
1962 ല്‍ കണ്ണൂര്‍ ജില്ലയിലെ മട്ടന്നൂരില്‍ സി.എം ജാനകിയമ്മയുടെയും സി.എച്ച് പത്മനാഭന്‍ നമ്പ്യാരുടെയും രണ്ടാമത്തെ മകനായാണ് സി.എം ബല്‍റാം ജനിച്ചത്. 28 വയസ് വരെ തലശ്ശേരിയിലെ മനേക്കരയില്‍ ജീവിച്ച ബല്‍റാമിന്റെ കുടുംബം 1990ല്‍ മട്ടന്നൂരിലേക്ക് താമസം മാറുകയായിരുന്നു. കെ.എന്‍ സൗമിനിയാണ് ബല്‍റാം മട്ടന്നൂരിന്റെ ഭാര്യ, മകള്‍ ഗായത്രി.