ഡേവിഡ് ഫിഞ്ചറിന്റെ 1999 ലെ വിഖ്യാതമായ ഹോളിവുഡ് ചലച്ചിത്രമാണ് ‘ഫൈറ്റ് ക്ലബ്ബ്’. എന്നാൽ ഇനിമുതൽ ഇന്ത്യൻ സിനിമയ്ക്കും സ്വന്തമായി ഒരു ‘ഫൈറ്റ് ക്ലബ്ബ്’ വരാൻ പോവുകയാണ്. അണിയറയിലുള്ളത് തെന്നിന്ത്യൻ സിനിമയിലെ ബ്രാൻഡ് ആയി മാറിയ ലോകേഷ് കനകരാജ്.
കഴിഞ്ഞ ദിവസമാണ് തന്റെ പ്രൊഡക്ഷൻ കമ്പനിയായ ‘ജി സ്ക്വാഡി’ന്റെ ഔദ്യോഗിക പ്രഖ്യാപനം ലോകേഷ് കനകരാജ് നടത്തിയത്. സുഹൃത്തുക്കളുടെയും തന്റെ അസ്സിസ്റ്റന്റ് ഡയറക്ടേഴ്സിന്റെയും സിനിമകൾക്കാണ് ജി സ്ക്വാഡ് തുടക്കത്തിൽ പ്രാധാന്യം നൽകുന്നതെന്ന് ലോകേഷ് വ്യക്തമാക്കിയിരുന്നു.
ഇപ്പോഴിതാ ജി സ്ക്വാഡിന്റെ ആദ്യ നിർമ്മാണ സംരംഭമായ ‘ഫൈറ്റ് ക്ലബ്ബ്’ എന്ന ചിത്രത്തിന്റെ ഫസ്റ്റ്ലുക്ക് പോസ്റ്റർ പുറത്തുവിട്ടിരിക്കുകയാണ് ലോകേഷ് കനകരാജ്. അബ്ബാസ് എ റഹ്മത്ത് ആണ് ചിത്രത്തിന്റെ തിരക്കഥയും സംവിധാനവും നിർവഹിക്കുന്നത്. ഉറിയടി ഫ്രാഞ്ചൈസിയിലൂടെ ശ്രദ്ധ നേടിയ വിജയ് കുമാര് ആണ് ചിത്രത്തിൽ നായകനായി എത്തുന്നത്.
ലിയോൺ ബ്രിട്ടോ ഛായാഗ്രഹണം നിർവഹിക്കുന്ന ചിത്രത്തിൽ ഗോവിന്ദ് വസന്തയാണ് സംഗീത സംവിധാനം നിർവഹിക്കുന്നത്. ഈ വർഷം അവസാനത്തോടെ ചിത്രീകരണം ആരംഭിക്കുന്ന ഫൈറ്റ് ക്ലബ്ബ് അടുത്ത വർഷം പകുതിയോടെ തിയേറ്ററുകളിൽ എത്തുമെന്നാണ് പ്രതീക്ഷിക്കുന്നത്. സംവിധാനം ചെയ്ത അഞ്ച് സിനിമകളും വമ്പൻ വിജയമാക്കിയ ലോകേഷ് കനകരാജ് നിർമ്മാതാവ് കൂടിയാവുമ്പോൾ സിനിമയുടെ ക്വാളിറ്റിയിലും കുറവുകൾ ഉണ്ടാവില്ലെന്നാണ് തെന്നിന്ത്യൻ സിനിമ പ്രേമികൾ പ്രതീക്ഷിക്കുന്നത്.