തെലുങ്കില്‍ ഹിറ്റ് അടിച്ച് അനുപമ പരമേശ്വരന്‍. അനുപമ അതീവ ഗ്ലാമറസ് ആയി എത്തിയ ‘ടില്ലു സ്‌ക്വയര്‍’ ആഗോളതലത്തില്‍ ഗംഭീര കളക്ഷന്‍ ആണ് നേടിയിരിക്കുന്നത്. ചിത്രം 125 കോടിയോളമാണ് ബോക്‌സ് ഓഫീസില്‍ നിന്നും നേടിയിരിക്കുന്നത്. ഓപ്പണിംഗ് ദിനത്തില്‍ തന്നെ 23.7 കോടി രൂപ ചിത്രത്തിന് ലഭിച്ചിരുന്നു.
125 കോടിയിലധികം കളക്ഷന്‍ നേടിയ ടില്ലു സ്‌ക്വയര്‍ ഇനി ഒ.ടി.ടി സ്ട്രീമിംഗ് ആരംഭിക്കാന്‍ ഒരുങ്ങുകയാണ്. മാര്‍ച്ച് 29ന് റിലീസ് ചെയ്ത ചിത്രം ഏപ്രില്‍ 26 മുതല്‍ ഒ.ടി.ടിയില്‍ സ്ട്രീമിംഗ് ആരംഭിക്കും എന്നാണ് റിപ്പോര്‍ട്ടുകള്‍. സിനിമയുടെ ഡിജിറ്റല്‍ അവകാശം റെക്കോര്‍ഡ് തുകയ്ക്ക് നെറ്റ്ഫ്‌ലിക്‌സ് സ്വന്തമാക്കിയതായാണ് ഒടിടി പ്ലേ റിപ്പോര്‍ട്ട് ചെയ്യുന്നത്.
ചിത്രത്തിന്റെ റിലീസിന് മുമ്പേ അനുപമയുടെ ഗ്ലാമര്‍ അവതാര്‍ ശ്രദ്ധ നേടിയിരുന്നു. ആദ്യമായാണ് ഒരു സിനിമയില്‍ അനുപമ ഇത്രയും ഗ്ലാമറസ് ആയി പ്രത്യക്ഷപ്പെടുന്നത്. 2022ല്‍ പുറത്തിറങ്ങിയ ക്രൈം കോമഡി ചിത്രം ‘ഡിലെ തില്ലു’വിന്റെ രണ്ടാം ഭാഗമാണ് ഈ സിനിമ. മാലിക് റാം ആണ് സംവിധാനം. സിദ്ദു ജൊന്നാലഗഢ ആണ് നായകന്‍.
അനുപമയുടെ ഗ്ലാമറസ് അവതാര്‍ മാത്രമല്ല, ലിപ്ലോക് അടക്കമുള്ള ഇന്റിമേറ്റ് രംഗങ്ങളും ചിത്രത്തില്‍ ഉണ്ടായിരുന്നു. ഇങ്ങനൊയൊരു വേഷം ചെയ്യുന്നതിനെ കുറിച്ച് അനുപമ സംസാരിക്കുകയും ചെയ്തിരുന്നു. തന്റെ 29-ാം വയസില്‍ വ്യത്യസ്തമായ വേഷങ്ങള്‍ ചെയ്യേണ്ടതുണ്ട്. താന്‍ ഒരേതരം റോളുകള്‍ ചെയ്യുന്നതിനാല്‍ മാധ്യമപ്രവര്‍ത്തകരും പ്രേക്ഷകരും ചോദ്യം ചെയ്യാന്‍ തുടങ്ങിയെന്ന് അനുപമ പറഞ്ഞിരുന്നു.
