ബേസിൽ ജോസഫിനെ കേന്ദ്ര കഥാപാത്രമാക്കി സംഗീത് പി രാജൻ ഒരുക്കിയ ചിത്രമായിരുന്നു ‘പാൽതു ജാൻവർ’. മികച്ച പ്രേക്ഷക സ്വീകാര്യത നേടിയ ചിത്രത്തെ കുറിച്ച് മൃഗ സംരക്ഷണ വകുപ്പ് മന്ത്രി ചിഞ്ചു റാണി പറഞ്ഞ കാര്യങ്ങളാണ് ശ്രദ്ധ നേടുന്നത്. കേരളത്തിലെ എല്ലാ ലൈഫ് സ്റ്റോക് ഇൻസ്പെകർമാരും വെറ്റിനറി ഡോക്ടർമാരും കണ്ടിരിക്കേണ്ട ചിത്രമാണ് പാൽതു ജാൻവർ എന്നാണ് മന്ത്രി പറഞ്ഞത്.
സിനിമ ഇഷ്ടപ്പെട്ടെന്നും, സ്വന്തം മക്കൾക്ക് അസുഖം വരുമ്പോൾ പരിപാലിക്കുന്നത് പോലെ ചിത്രത്തിലെ കഥാപാത്രം വളർത്തുമൃഗത്തോട് കാണിക്കുന്ന സ്നേഹം തൻ്റെ ഉള്ളിൽ തട്ടിയെന്നും മന്ത്രി അഭിപ്രായപ്പെട്ടു.
കൊല്ലം കാർണിവൽ തീയേറ്ററിലായിരുന്നു മന്ത്രി സിനിമ കാണാനെത്തിയത്. മുൻകൂട്ടി അറിയിപ്പൊന്നുമില്ലാതെ മന്ത്രിയുടെ അപ്രതീക്ഷിത വരവ് കാണികൾക്കും കൗതുകമായി. മന്ത്രിയുടെ പ്രതികരണം ബേസിൽ ഫേസ്ബുക്കിൽ പങ്കുവെച്ചിട്ടുണ്ട്.
കുടിയാന്മല എന്ന ഗ്രാമത്തിലെഒരു വെറ്റിനറി ആശുപത്രിയുടെ പശ്ചാത്തലത്തിൽ കഥ പറയുന്ന ചിത്രത്തിൽ ബേസിൽ ലൈവ്സ്റ്റോക്ക് ഇൻസ്പെക്ടറുടെ വേഷത്തിലാണ് എത്തുന്നത്