റിലീസിനൊരുങ്ങുന്ന തമിഴ് ചിത്രങ്ങളിൽ ഏറെ പ്രതീക്ഷ ഉയർത്തുന്ന ഒന്നാണ് ചന്ദ്രമുഖി 2. രജനികാന്തും ജ്യോതികയും മികച്ച പ്രകടനം നടത്തിയ ചന്ദ്രമുഖിയുടെ രണ്ടാം ഭാഗമായാണ് ചിത്രമെത്തുക. രണ്ടാം പതിപ്പിൽ രാഘവ ലോറൻസ് ആണ് നായകൻ. ബോളിവുഡ് താരം കങ്കണ റണൗട്ടാണ് ചന്ദ്രമുഖിയായെത്തുക.
എന്നാൽ ചിത്രം കാത്തിരുന്നവർക്ക് നിരാശ നൽകുന്ന വാർത്തയാണ് ഇപ്പോൾ പുറത്തുവരുന്നത്. ചന്ദ്രമുഖി 2വിന്റെ റിലീസ് മാറ്റി വച്ചതായി ലൈക്ക പ്രൊഡക്ഷൻസ് അറിയിച്ചു. സെപ്റ്റംബർ 15ന് ചിത്രം റിലീസ് ചെയ്യുന്നതെന്നാണ് നേരത്തെ അറിയിച്ചിരുന്നത്. എന്നാൽ ചില സാങ്കേതിക പ്രശ്നങ്ങളാൽ റിലീസ് മാറ്റുകയായിരുന്നു. ഇനി സെപ്റ്റംബർ 28ന് ആകും ചന്ദ്രമുഖി 2 തീയേറ്ററുകളിലെത്തുക.
17 വര്ഷത്തിനു ശേഷമാണ് ഇപ്പോൾ രണ്ടാം ഭാഗം വരുന്നത്. ഒരിടവേളയക്കു ശേഷം കോമഡി രംഗത്തേക്ക് വടിവേലു തിരിച്ചെത്തുകയാണ് ചന്ദ്രമുഖി 2 ൽ.പി വാസുവാണ് ചിത്രം സംവിധാനം ചെയ്തിരിക്കുന്നത്. ഓസ്കാര് ജേതാവ് എം എം കീരവാണിയാണ് സംഗീതം. ഛായാഗ്രഹണം ആര് ഡി രാജശേഖര് ആണ്.
കലാസംവിധാനം തോട്ട തരണി. ലക്ഷ്മി മേനോന്, മഹിമ നമ്പ്യാര്, രാധിക ശരത് കുമാര്, വിഘ്നേഷ്, രവിമരിയ, സൃഷ്ടി ഡാങ്കെ, സുഭിക്ഷ, വൈ ജി മഹേന്ദ്രന്, റാവു രമേഷ്, സായ് അയ്യപ്പന്, സുരേഷ് മേനോന്, ശത്രു, ടി എം കാര്ത്തിക് എന്നിവരാണ് മറ്റ് പ്രധാന വേഷങ്ങൾ കൈകാര്യം ചെയ്തിരിക്കുന്നത്.
തമിഴ്, ഹിന്ദി, തെലുങ്ക്, മലയാളം, കന്നഡ ഭാഷകളിൽ ആകും സിനിമ റിലീസിന് എത്തുക. മലയാളത്തിലെ എവര്ഗ്രീന് ഹിറ്റ് മണിച്ചിത്രത്താഴിന്റെ തമിഴ് റീമേക്ക് ആയിരുന്നു ചന്ദ്രമുഖി.രജനീകാന്ത്, ജ്യോതിക, പ്രഭു, നയന്താര എന്നിവര് കേന്ദ്ര കഥാപാത്രങ്ങളെ അവതരിപ്പിച്ച ‘ചന്ദ്രമുഖി’ 2005 ഏപ്രില് 14-നാണ് റിലീസ് ചെയ്തത്.