നടനും എഴുത്തുകാരനുമായ വി.കെ ശ്രീരാമന്റെ വീട്ടില്‍ അപ്രതീക്ഷിത അതിഥിയായി എത്തി മമ്മൂട്ടിയും ഭാര്യ സുല്‍ഫത്തും. നിര്‍മ്മാതാവ് രവി കൊട്ടാരക്കരയുടെ മകളുടെ വിവാഹത്തില്‍ പങ്കെടുക്കാനായി ഗുരുവായൂരിലേക്ക് പോകവെയാണ് താരം തന്റെ സുഹൃത്തിന്റെ വീട്ടില്‍ എത്തിയത്. മമ്മൂട്ടിയുടെ സന്ദര്‍ശനത്തെ കുറിച്ച് രസകരമായ ഒരു കുറിപ്പും ഒരു ചിത്രവും ശ്രീരാമന്‍ ഫെയ്‌സ്ബുക്കില്‍ പങ്കുവച്ചിട്ടുണ്ട്. ഒരുപാട് സിനിമകളില്‍ ഒന്നിച്ച് അഭിനയിച്ചിട്ടുള്ള മമ്മൂട്ടിയും ശ്രീരാമനും ജീവിതത്തിലും സുഹൃത്തുക്കളാണ്.
ശ്രീരാമന്റെ കുറിപ്പ്:
ഗുരുവായൂരൊരു കല്യാണത്തിന് പോണ വഴി കയറി വന്നതാ രണ്ടാളും കൂടി. വന്നതും അട്ക്കളയില്‍ വന്ന് നമ്മടെ തീയ്യത്തിയെ വെരട്ടി.
‘നിങ്ങളെന്താ ഇവന് തിന്നാന്‍ കൊടുക്കുന്നത്?’
‘ചോറും മീങ്കൂട്ടാനും പപ്പടം ചുട്ടതും… ചെലേപ്പൊ പയറുപ്പേരീം ‘
പിന്നെ… ?
‘പിന്നെ പ്രത്യേകിച്ചൊന്നൂല്ലാ’
‘പിന്നെന്തിനാണ് ഇത്രയും പഴക്കുലകള്‍? ഇവിടെ ആനയോ മറ്റോ ഉണ്ടോ? നിങ്ങള്‍ രണ്ടാളല്ലേ ഉള്ളൂ ഈ വീട്ടില്‍?’
‘മൂപ്പരടെ പണിയാ, പറമ്പിലുള്ളത് പോരാഞ്ഞ് കുന്നംകുളത്തുള്ള പഴുന്നാന്‍ മാത്തൂന്റെ പീട്യേന്നും വേടിച്ചൊടന്ന് ഇബടെ ഞാത്തും.’
‘ആരാ ഈ പഴുന്നാന്‍ മാത്തു?’ ചോദ്യം എന്നോടായിരുന്നു.
‘പഴുന്നാന്‍ മാത്തൂന്റെ അപ്പന്‍ പഴുന്നാന്‍ ഇയ്യാവു ആണ് BC 60ല്‍ കുന്നങ്കൊളത്ത് ബനാനാ റിപ്പബ്ലിക്ക് സ്ഥാപിച്ചത്.’
‘അപ്പോപ്പിന്നെ ഡെയ്‌ലി ഓരോ കുലവാങ്ങി ഞാത്തിക്കോ. ഇട്ടിക്കോരയുടെ ഒരു ഫോട്ടോ വെച്ച് മെഴുകുതിരിയും കത്തിച്ചോ’
അങ്ങനെ മല പോലെ വന്ന പ്രശ്‌നം പെരുച്ചാഴിയെപ്പോലെ വെളിച്ചം കണ്ടമ്പരന്നു.