താരസംഘടനയായ അമ്മയുടെ മാനേജർ അതുല്യയുടെ ആരോപണങ്ങളെ പൂർണ്ണമായും തള്ളി ജനറൽ സെക്രട്ടറി കുക്കു പരമേശ്വരൻ. ആരോപണങ്ങൾ മുഴുവൻ കെട്ടിച്ചമച്ചതാണെന്നും ഇതിനെതിരെ നിയമനടപടി സ്വീകരിച്ചെന്നും കുക്കു പരമേശ്വരൻ പ്രമുഖ മാധ്യമത്തോട് പ്രതികരിച്ചു.
തനിക്കെതിരെ പ്രചരിക്കുന്ന പരാതികളെല്ലാം അവാസ്തവമാണെന്നും എല്ലാം ഒരു തൊഴിൽ തർക്കത്തിൽ നിന്ന് തുടങ്ങിയതാണെന്നും കുക്കു പരമേശ്വരൻ പ്രതികരിച്ചു. പിന്നീട് അത് ചിലർ വഴി തിരിച്ചുവിടുകയായിരുന്നു. അതുല്യയുടെ ഇപ്പോഴത്തെ പരാതി പൂർണമായും കെട്ടിച്ചമച്ചതാണെന്നും കുക്കു പരമേശ്വരൻ പറഞ്ഞു.
എല്ലാ കാര്യങ്ങളും പൊലീസ് അന്വേഷണത്തിൽ പൊതുസമൂഹത്തിന് ബോധ്യപ്പെടും. ആരോപണങ്ങൾക്കെതിരെ നിയമനടപടികൾ ആരംഭിച്ചു കഴിഞ്ഞു. എല്ലാ കാര്യങ്ങളും മുതിർന്ന അംഗങ്ങളെ അപ്പപ്പോൾ അറിയിച്ചിട്ടുണ്ട്. എല്ലാ പരാതികൾക്കും പരിഹാരം ജനറൽബോഡിയിൽ ഉണ്ടാകുമെന്നും കുക്കു പരമേശ്വരൻ പ്രതികരിച്ചു.
അതുല്യയുമായി അപകീർത്തികരമായ ബന്ധമുണ്ടെന്ന് പറയാൻ സെക്യൂരിറ്റി ജീവനക്കാരനെ കുക്കുപരമേശ്വരൻ നിർബന്ധിച്ചെന്നായിരുന്നു പരാതി. കൊച്ചി സിറ്റി പൊലീസ് കമ്മീഷണർക്ക് അതുല്യ പരാതി നൽകിയിട്ടുണ്ട്.